យោងតាមអគ្គមេបញ្ជាការរបស់អ៊ុយក្រែន បានឲ្យដឹងថា ស្ថានភាពនៅភាគខាងកើតនៃប្រទេសអ៊ុយក្រែន មានសភាព «កាន់តែអាក្រក់ទៅៗ» ដោយកងទ័ពរុស្ស៊ីបានបង្កើនការវាយប្រហាររបស់ខ្លួន។

តាមរយៈកម្មវិធីផ្ញើសារ Telegram នៅថ្ងៃសៅរ៍ (ទី១៣ ខែមេសា) នេះ លោកវរសេនីយ៍ឯក Oleksandr Syrskyi បានឲ្យដឹងថា កងកម្លាំងរុស្ស៊ីបន្តរុលទៅមុខតាមបណ្ដោយនៅតំបន់ទីក្រុង Lyman, Bakhmut និង Pokrovsk។ លោកបាននិយាយថា ការឆ្លើយតបរបស់អ៊ុយក្រែន រួមមានការដាក់ពង្រាយប្រព័ន្ធការពារដែនអាកាស និងអាវុធសង្គ្រាមអេឡិចត្រូនិកទៅកាន់តំបន់ដែលមានបញ្ហាច្រើនបំផុត។

ស្ថាប័នតាមដានឃ្លាំមើលសង្គ្រាមតាមប្រព័ន្ធអ៊ីនធឺណិត DeepState បានឲ្យដឹងថា កងទ័ពវិមានក្រឹមឡាំងបានដណ្ដើមយក Bohdanivka ដែលជាភូមិមួយក្នុងក្នុងចម្ងាយរាប់គីឡូម៉ែត្រពីគោលដៅសំខាន់បន្ទាប់របស់ពួកគេ នៅតំបន់ Donetsk។ តែអ៊ុយក្រែនបាននិយាយថា ភូមិនេះនៅតែស្ថិតនៅក្រោមការគ្រប់គ្រងរបស់ខ្លួនដដែល។

យ៉ាងណាក្ដី កងកម្លាំងរបស់ប្រធានាធិបតី លោក Vladimir Putin កំពុងរុលទៅមុខនៅភាគខាងកើតនៃប្រទេសអ៊ុយក្រែន ក្នុងការស្វែងរកការកាន់កាប់លើតំបន់ Donetsk ទាំងមូល ដោយនេះជាគោលដៅមួយក្នុងចំណោមគោលដៅនៃការលុកលុយពេញលេញរបស់រុស្ស៊ី កាលពីឆ្នាំ២០២២។

អ្វីដែលសំខាន់នោះ គឺថា កងកម្លាំងរុស្ស៊ីកំពុងឆ្លៀតយកប្រៀបលើកង្វះខាតកម្លាំងទាហាន និងគ្រាប់រំសេវរបស់អ៊ុយក្រែន ដែលមានសភាពកាន់តែធ្ងន់ធ្ងរឡើងៗ ដោយការពន្យាពេលជាច្រើនខែក្នុងការអនុម័តកញ្ចប់ជំនួយយោធារបស់អាមេរិកដែលមានតម្លៃជាង ៦០ពាន់លានដុល្លារអាមេរិក។

អាជ្ញាធរយោធាអ៊ុយក្រែន និងសម្ព័ន្ធមិត្តលោកខាងលិចព្រួយបារម្ភថា ប្រសិនបើគ្មានការបំពេញបន្ថែមកងទ័ពរបស់ទីក្រុងគីវ និងការផ្តល់ជំនួយដែលត្រូវការយ៉ាងខ្លាំងទេនោះ ការការពារប្រទេសអាចនឹងដួលរលំនៅទីបំផុត៕