បាត់ដំបង ៖ នាឱកាសថ្ងៃទី១ នៃពិធីបុណ្យចូលឆ្នាំថ្មីប្រពៃណីជាតិខ្មែរ ត្រូវនឹងថ្ងៃទី១៣ ខែមេសា ឆ្នាំ២០២៤ មានបងប្អូនប្រជាពលរដ្ឋ និងភ្ញៀវទេសចរជាតិ អន្តរជាតិប្រមាណជាង ១០ ម៉ឺននាក់ បានមកលេងកម្សាន្តនៅក្នុងខេត្តបាត់ដំបង។ នេះបើតាមការបញ្ជាក់ពីលោក ហម អរុណ អនុប្រធានមន្ទីរទេសចរណ៍ខេត្តបាត់ដំបង។

លោក ហម អរុណ បានបង្ហាញក្ដីរំពឹងថា ខេត្តបាត់ដំបងនឹងទទួលបានកំណើនភ្ញៀវទេសចរច្រើនកុះការបន្តទៀតនៅថ្ងៃបន្តបន្ទាប់នៃពិធីបុណ្យចូលឆ្នាំខ្មែរ ខណៈព្រឹត្តិការណ៍សង្រ្កាន្តបាត់ដំបងមានកម្មវិធីកម្សាន្តសប្បាយជាច្រើនសម្រាប់ឱ្យប្រជាពលរដ្ឋ និងទេសចរលេងកម្សាន្តសប្បាយ។

​ជាមួយគ្នានេះ ប្រជាពលរដ្ឋបានបង្ហាញការកោតសរសើរចំពោះរដ្ឋបាលខេត្តបាត់ដំបងដែលបានរៀបចំសង្រ្កាន្តឆ្នាំនេះ មានលក្ខណៈទ្រង់ទ្រាយធំ ប្លែក និងមានភាពទាក់ទាញខ្លាំងសម្រាប់លេងកម្សាន្តសប្បាយ និងផ្ដិតយករូបភាព។

ប្រជាពលរដ្ឋអំពាវនាវដល់ភ្ញៀវទេសចរជាតិ និងអន្តរជាតិឱ្យមកចូលរួមលេងកម្សាន្តសប្បាយក្នុងព្រឹត្តិការណ៍សង្រ្កាន្តបាត់ដំបងដែលនឹងមានកម្មវិធីកម្សាន្តសប្បាយជាច្រើនបានត្រៀមលក្ខណៈរួចរាល់សម្រាប់ទទួលស្វាគមន៍ភ្ញៀវទេសចរ។

សូមបញ្ជាក់ថា រដ្ឋបាលខេត្តបាត់ដំបង បានសហការជាមួយសហភាពសហព័ន្ធយុវជនកម្ពុជាខេត្តបាត់ដំបង រៀបចំព្រឹត្តិការណ៍សង្ក្រាន្តបាត់ដំបងឆ្នាំនេះ រយៈពេល៥ថ្ងៃក្នុងគោលបំណងបង្កើតការសប្បាយរីករាយជូនដល់បងប្អូនប្រជាពលរដ្ឋក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។ ព្រឹត្តិការណ៍សង្ក្រាន្តបាត់ដំបងឆ្នាំនេះ ក៏ធ្វើឡើងដើម្បីផ្សព្វផ្សាយពីវប្បធម៌ប្រពៃណីដ៏ល្អផូរផង់តាមរយៈការរៀបចំកម្មវិធីសិល្បៈ លេងល្បែងប្រជាប្រិយផ្សេងៗ ជាពិសេសចង់បង្ហាញដល់ភ្ញៀវជាតិអន្តរជាតិឱ្យស្គាល់ពីទំនៀមទម្លាប់នៃការរស់នៅក៏ដូចជាសក្តានុពលនានារបស់ខេត្តបាត់ដំបង តាមរយៈការរៀបចំដាក់តាំងបង្ហាញនូវផលិតផលតាមបណ្តាក្រុង ស្រុកទាំង១៤ ការតាំងបង្ហាញមុខម្ហូបអ្នកបាត់ដំបង និងនៅពេលរាត្រីមានការប្រគំតន្ត្រី ការប្រកួតកីឡាប្រដាល់គុនខ្មែរ ព្រមទាំងមានការរៀបចំតុបតែងលម្អភ្លើងពណ៌យ៉ាងស្អាតផងដែរ។

សូមជម្រាបថា ព្រឹត្តិការណ៍សង្ក្រាន្តបាត់ដំបងឆ្នាំនេះប្រព្រឹត្តទៅចាប់ថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៤ នៅតាមបណ្តោយវិថី សម្តេចក្រឡាហោម ស ខេង ក្នុងបរិវេណវិទ្យាល័យនេតយ៉ង់ និងបរិវេណខាងមុខសារមន្ទីរ ប្រវត្តិសាស្ត្រខេត្ត (សាលាខេត្ត) ស្ថិតក្នុងក្រុងបាត់ដំបង ខេត្តបាត់ដំបង៕ ដោយ ៖ សុភត្រ