ក្នុងឱកាសពិធីបុណ្យចូលឆ្នាំប្រពៃណីជាតិខ្មែរនេះ សម្រាប់សង្ក្រាន្តថ្ងៃទី៣ នៃពិធី​បុណ្យ​ចូលឆ្នាំ​ប្រពៃណី​ជាតិខ្មែរ នៅសង្ក្រាន្តវត្តភ្នំ មានប្រជាពលរដ្ឋ និងភ្ញៀវទេសចរ បន្តមកជួបជុំ​កម្សាន្ត​កាន់​តែច្រើន​នៅ​តំបន់សើម។

ក្នុងព្រឹត្តិការណ៍សង្ក្រាន្តវត្តភ្នំដែលបានដំណើរការទៅរយៈពេល៣ថ្ងៃនេះ ប្រជាពលរដ្ឋ​ដែល​មក​លេង​កម្សាន្ត បានប្រាប់ BTV ឱ្យដឹងនៅថ្ងៃទី១៥ ខែមេសា ឆ្នាំ២០២៤ថា ការរៀបចំ​សង្ក្រាន្ត​វត្តភ្នំ​នាឆ្នាំ​នេះ​បានបង្កភាពសប្បាយរីករាយយ៉ាងក្រៃលែង ដោយសារការតុបតែង និងកម្មវិធីអម​ផ្សេង​ៗ​បាន​ផ្តល់​ការលេងកម្សាន្តជួបជុំដែលមានលក្ខណៈធំជាងបណ្តាឆ្នាំមុនៗ។ ប្រជាពលរដ្ឋបានកោតសរសើរចំពោះការប្រកាសរបស់រាជរដ្ឋាភិបាលដែលបានឱ្យរាជធានី-ខេត្ត​នីមួយៗរៀបចំរៀងៗខ្លួន ដែលផ្តល់​លទ្ធភាព​ដល់​ប្រជាពលរដ្ឋ​អាច​ជ្រើស​រើស​ការ​ដើរ​កម្សាន្ត​ក្នុង​ឱកាស​សង្ក្រាន្ត​ឆ្នាំនេះបានគ្រប់ទីកន្លែង។

ជាមួយគ្នា ភ្ញៀវបរទេស លើកឡើងថា ការរៀបចំសង្ក្រានរបស់កម្ពុជាពិតជាធ្វើបានល្អ ទាំង​ការ​តុប​តែង ការជួបជុំមិនថាប្រជាពលរដ្ឋកម្ពុជា ឬទេសចរណ៍បរទេសនោះទេ ខណៈភ្ញៀវបរទេសរូបនេះ ពេល​បាន​ចូលរួមលេងកម្សាន្តសង្ក្រានធ្វើឱ្យគាត់យល់ថាខ្លួនជាប្រជាពលរដ្ឋខ្មែរមួយរូប។

ចំពោះសង្ក្រានវត្តភ្នំក្នុងឆ្នាំនេះក្រៅពីតំបន់សើម សាលារាជធានីភ្នំពេញ បាន​រៀប​ចំ​ការ​ដាក់​បង្ហាញ​ឧបករណ៍​ជា​ច្រើន​ដែល​ជា​សម្បត្តិជាតិដែលដូនតាបន្សល់ទុក និងល្បែងប្រជាប្រិយ​សម្រាប់​លេង​កម្សាន្ត​ ដើម្បីថែរក្សាកេរ្ត៍ដំណែលនេះឱ្យបានគង់វង្សយូរអង្វែង។ លើសពីនេះ កត្តាដែល​ប្រពលរដ្ឋ​ជួប​ជុំគ្នា​ សប្បាយរីករាយក្នុងឱកាសសង្រ្កានឆ្នាំថ្មី ឬពិធីបុណ្យផ្សេងៗបែបនេះ គឺដោយសារ​ប្រទេស​កម្ពុជា​មានសុខសន្តិភាព សុវត្ថិភាពល្អប្រសើរ ក្រោមការដឹកនាំប្រកប​ដោយ​ភាព​ឈ្លាស​វៃ​របស់​សម្តេចធិបតី ហ៊ុន ម៉ាណែត នាយករដ្ឋមន្រ្តីនៃ​ព្រះរាជា​ណា​ចក្រ​កម្ពុជា​ធ្វើ​ឲ្យ​ប្រទេស​ជាតិ​បន្ត​អភិវ​ឌ្ឍ​រីកចម្រើនឥតឈរលើគ្រប់វិស័យ៕