ភ្នំពេញ ៖ ដោយមានការណែនាំពីលោក សុខ ពេញវុធ អភិបាលនៃគណៈអភិបាលខណ្ឌ អាជ្ញាធរ​ខណ្ឌដូនពេញ បានបន្តចុះរៀបចំសណ្ដាប់ធ្នាប់ចុះជាប្រចាំឲ្យមាន របៀបរៀបរយសន្តិសុខ សណ្ដាប់​ធ្នាប់សាធារណៈ បរិស្ថាន អនាម័យ និងស្តាអណ្តូងលូដែល​បានកកស្ទះដោយសារកាក​សំណល់ សំរាមផ្សេងៗហូរចូលស្ទះផ្លូវទឹក និងដក់ទឹកមកលើទ្រូងផ្លូវ ដើម្បីលើក​សោភ័ណភាព​ទីក្រុង កាត់​បន្ថយការកកស្ទះ និងរក្សាចិញ្ជើមផ្លូវទុកសម្រាប់ អ្នកដំណើរថ្មើជើង ឬជនពិការភាពធ្វើដំណើរ។

ជាក់ស្ដែងវេលាម៉ោង១០ព្រឹកថ្ងៃច័ន្ទ ទី២៦ ខែកក្កដា ឆ្នាំ២០២១ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានដឹកនាំមន្ត្រីការិយាល័យសាធារណៈការខណ្ឌដូនពេញ ចុះ​ត្រួតពិនិត្យ និងស្តាអណ្តូងលូដែលបានកកស្ទះដោយសារកាកសំណល់ សំរាមផ្សេងៗហូរចូល​ស្ទះ​ផ្លូវទឹក និងបានដក់ទឹកមកលើទ្រូងផ្លូវ ដោយបានចាត់ឲ្យ​មន្ត្រីធ្វើការ​ជួសជុល​ជាបន្ទាន់​តាម​លក្ខណៈបច្ចេកទេស ធ្វើអោយប្រព័ន្ធលូដំណើរការបានល្អវិញ ដើម្បី​បញ្ជៀស​ការកកស្ទះកាក​សំណល់​ផ្សេងៗ ក្នុងអណ្តូងលូ បណ្តាលឲ្យទឹកច្រាលមកលើទ្រូងផ្លូវ នៅចំណុចតាម​បណ្តោយ​វិថីព្រះស៊ីសុវត្ថិ (រង្វង់មូលសម្តេចសង្ឃជួនណាត) ។

ក្រោយក្រុមការងារការិយាល័យសាធារណៈការខណ្ឌដូនពេញ បានចុះស្តាបើកមុខទឹកឲ្យបានហូរ និង​គ្មានការស្ទះលូបណ្តាលឲ្យលិចផ្លូវទៀតនោះទេ។

ជាចុងក្រោយអាជ្ញាធរ​ខណ្ឌ​ សូម​សំណូមពរ​ដល់​បងប្អូនប្រជាពលរដ្ឋ ទាំងអស់គ្នា​ក្នុងមូលដ្ឋាន​ចូលរួម​បញ្ចេញ​សំរាម​ឲ្យ​ទាន់ម៉ោង វិចខ្ចប់​សំរាម​ឲ្យ​បានត្រឹមត្រូវ​ និងចូលរួម​រក្សា​ចិញ្ជើម​ផ្លូវ​សាធារណៈទាំងអស់គ្នា៕

អត្ថបទ៖ កុម្ភះ