អតីតប្រធានាធិបតីសហរដ្ឋអាមេរិក លោក Donald Trump បានបង្ហាញខ្លួននៅក្នុងបន្ទប់សវនាការនៅទីក្រុងញូវយ៉ក សហរដ្ឋអាមេរិក កាលពីថ្ងៃចន្ទសម្រាប់ការជម្រះក្តីបទព្រហ្មទណ្ឌលើកដំបូងមិនធ្លាប់មានចំពោះអ្នកដែលបានបម្រើការនៅក្នុងការិយាល័យ Oval ។

លោកប្រឈមបទចោទប្រកាន់ទាក់ទងនឹងប្រាក់បំបិតមាត់ដែលលោកបានចំណាយទៅឲ្យតារាភាពយន្តស្រីម្នាក់។

រដ្ឋអាជ្ញាបាននិយាយថា ក្នុងអំឡុងពេលយុទ្ធនាការបោះឆ្នោតឆ្នាំ ២០១៦ អតីតមេធាវីរបស់លោក Trump គឺលោក Michael Cohen បានចំណាយប្រាក់ចំនួន ១៣០ពាន់ដុល្លារដើម្បីបំបិតមាត់តារាភាពយន្តម្នាក់អំពីទំនាក់ទំនងដែលនាងមានជាមួយលោក Trump ។

ពួកគេនិយាយថា លោក Trump បានសងប្រាក់ទៅលោក Cohen វិញ បន្ទាប់ពីបានកត់ត្រាការចំណាយនោះជាប្រាក់ស្របច្បាប់។

លោក Trump ប្រឈមមុខបទចោទប្រកាន់ចំនួន ៣៤ករណី ពីបទក្លែងបន្លំកំណត់ត្រាអាជីវកម្ម។ ប៉ុន្តែលោកបានផ្តល់ចម្លើយពីភាពគ្មានទោស និងបាននិយាយថាករណីប្រឆាំងមកលើរូបលោក គឺជាការធ្វើទុក្ខបុកម្នេញផ្នែកនយោបាយ។

ការជ្រើសរើសគណៈវិនិច្ឆ័យ ត្រូវបានគេរំពឹងថានឹងប្រើពេលច្រើនសប្តាហ៍ ហើយការជម្រះក្តី ត្រូវបានគេរំពឹងថានឹងមានរយៈពេលពី៦សប្តាហ៍ទៅ៨សប្តាហ៍។