ប្រជាជនហ្ស៊កហ្ស៊ីរាប់ពាន់នាក់បានចេញតវ៉ាកាលពីថ្ងៃចន្ទ ហើយមានការផ្ទុះជម្លោះក្នុងចំណោមសមាជិកសភា នៅពេលដែលសមាជិកសភាបក្សកាន់អំណាចពន្លឿនការជជែកដេញដោលលើសេចក្ដីស្នើច្បាប់ស្តីពី ភ្នាក់ងារបរទេស ដែលត្រូវបានរិះគន់ដោយក្រុមអ្នករិះគន់លោកខាងលិច និងក្នុងស្រុកថាជាការបំផុសគំនិតដោយរុស្ស៊ី។
បាតុករជាង ៥.០០០នាក់បានប្រមូលផ្តុំនៅខាងក្រៅអគារសភាដែលសាងសង់ដោយសូវៀតរបស់ប្រទេសហ្ស៊កហ្ស៊ី ដោយទាមទារឱ្យរដ្ឋាភិបាលដកច្បាប់ដែលតម្រូវឱ្យអង្គការដែលទទួលយកមូលនិធិពីបរទេសចុះឈ្មោះជាភ្នាក់ងារបរទេស បើពុំនោះត្រូវប្រឈមនឹងការផាកពិន័យ។
ក្រុមអ្នករិះគន់ហ្ស៊កហ្ស៊ី បានហៅសេចក្ដីស្នើច្បាប់នេះថា ច្បាប់រុស្ស៊ី ដោយប្រៀបធៀបពង្រាងច្បាប់នេះទៅនឹងច្បាប់ដែលប្រើដោយវិមានក្រឹមឡាំង ដើម្បីបង្ក្រាបក្រុមប្រឆាំង។
គណៈកម្មាធិការកិច្ចការច្បាប់របស់សភា ដែលគ្រប់គ្រងដោយគណបក្សក្ដីស្រមៃហ្ស៊កហ្ស៊ី ( Georgian Dream) កំពុងកាន់អំណាច និងសម្ព័ន្ធមិត្តរបស់ខ្លួន បានយល់ព្រមលើសេចក្តីស្នើច្បាប់នេះ ដោយបានបើកផ្លូវសម្រាប់ដាក់ជូនឲ្យអនុម័តលើកដំបូងនៅថ្ងៃអង្គារនេះ ។
ក្រុមអ្នកតវ៉ាបានស្រែកថា "រុស្សី! រុស្ស៊ី!" នៅខាងក្រៅខ្សែការពាររបស់នគរបាលដែលចូលទៅជិតសភា ដោយមានកាណុងបាញ់ទឹក ដាក់ពង្រាយនៅក្បែរនោះ។
ក្រសួងមហាផ្ទៃហ្ស៊កហ្ស៊ីបាននិយាយនៅក្នុងសេចក្តីថ្លែងការណ៍មួយថា អ្នកតវ៉ា ១៤ នាក់ត្រូវបានឃុំខ្លួនពីបទបំពានលើសណ្តាប់ធ្នាប់សាធារណៈ ហើយមន្ត្រីនគរបាលម្នាក់បានរងរបួស៕