តំបន់នានានៅប្រទេសកាហ្សាក់ស្ថានភាគខាងជើង និងតំបន់អ៊ូរ៉ាល់(Urals) របស់ប្រទេសរុស្ស៊ី ត្រូវបានទឹកជន់លិចកាលពីថ្ងៃចន្ទ ខណៈទឹកចេញពីការរលាយទឹកកក បានហក់ឡើងប្រៀបច្រាំនៃដៃទន្លេនានា របស់ប្រព័ន្ធទន្លេវែងជាងគេបំផុតទី៧របស់ពិភពលោក បង្ខំឲ្យមនុស្សជាង១២៥.០០០នាក់ភៀសខ្លួនចេញពីផ្ទះសម្បែង។

តំបន់អ៊ូរ៉ាល់ ភាគខាងត្បូង របស់រុស្ស៊ី និងតំបន់ភាគខាងជើងរបស់ប្រទេសកាហ្សាក់ស្ថាន បាននិងកំពុង ព្យាយាមទប់ទល់ទឹកជំនន់ដ៏ធ្ងន់ធ្ងរបំផុត មិនធ្លាប់មានចាប់តាំងពីព្រិលធ្លាក់បានរលាយភ្លាមៗ ស្របពេលមានភ្លៀងធ្លាក់ខ្លាំង បង្កជាទឹកជន់មុនពេលរដូវរងា។

ទឹកហក់ឡើងខ្ពស់នៅតាមដៃទន្លេ Ob ដែលបានកើងឡើងនៅតំបន់ភ្នំ Altai ភាគខាងត្បូង តំបន់ស៊ីបេរី និងហូរចាក់ក្នុងមហាសមុទ្រអាកទិក ហួសពីកម្រិតទឹកហៀរច្រាំង ដែលបណ្ដាលឲ្យទីក្រុងនានានៅក្នុងប្រទេសរុស្ស៊ី និងកាហ្សាក់ស្ថាន នៅក្រោមទឹក។

អ្នកសារព័ត៌មាន Reuters ម្នាក់ បាននិយាយថា ស្រុកមួយចំនួននៅក្នុងទីក្រុង Petropavlovsk ក្នុងប្រទេសកាហ្សាក់ស្ថានភាគខាងជើង ត្រូវបានជន់លិចទាំងស្រុង ។ទីក្រុងនេះស្ថិតនៅលើទន្លេ Ishim River ដៃទន្លេ Irtysh និងដៃទន្លេមេ Ob។

ផ្ទះសម្បែងជិត១.០០០ ខ្នង ត្រូវបានទឹកជន់លិច នៅក្នុងតំបន់ភាគខាងជើងរបស់ប្រទេសកាហ្សាក់ស្ថាន ហើយមនុស្សជាង៥.០០០នាក់ ត្រូវបានជម្លៀស ខណៈដែលទឹកជំនន់នេះ បានបង្អាក់ដល់ការផ្គត់ផ្គង់ ថាមពល និងទឹកនៅក្នុងទីក្រុង Petropavlovsk៕