បាត់ដំបង៖ គិតត្រឹមព្រឹកថ្ងៃទី១៧ ខែមេសា ឆ្នាំ២០២៤ មានប្រជាពលរដ្ឋរស់នៅ​ក្នុង​ខេត្តបាត់​ដំបងជាង ១៥ ០០០នាក់បានធ្វើដំណើរទៅមកភ្នំពេញ-បាត់ដំបងតាមរថយន្ត​ក្រុង​ដែល​សម្ដេច​មហាបវរធិបតី ហ៊ុន ម៉ាណែត ប្រមុខ​រាជ​រដ្ឋាភិបាល​ផ្ដល់​ជូនដោយ​មិនបង់​ប្រាក់​ក្រោយ​បញ្ចប់​ការ​លេង​កម្សាន្ត និងជួបជុំគ្រួសារនៅស្រុកកំណើតនាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ។ នេះ​បើ​តាមលោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង។

ក្នុង​ឱកាសអញ្ជើញជូនដំណើរប្រជាពលរដ្ឋឡើងរថយន្តក្រុងពីបាត់ដំបងទៅភ្នំពេញវិញ នាព្រឹក​ថ្ងៃទី​១៧ ខែមេសា ឆ្នាំ២០២៤ លោក ព្រួញ រិទ្ធថា បានថ្លែង​អំណរគុណ​ដល់​សម្ដេច​មហា​បវរ​ធិបតី ហ៊ុន ម៉ាណែត នាយករដ្ឋមន្រ្តី​ដែល​តែងតែ​គិតគូរ​ដល់​បងប្អូន​ប្រជាពលរដ្ឋ​តាមរយៈ​ការ​ផ្ដល់​ឱ្យ​ពលរដ្ឋ​បានជិះរថយន្តក្រុងឥតគិតថ្លៃក្នុងឱកាសបុណ្យចូលឆ្នាំខ្មែរ។ជាមួយគ្នានេះ លោក​ប្រធាន​មន្ទីរ បានណែនាំដល់តៃកុង និងព្រូឡានទាំង​អស់​ត្រូវ​គិត​គូរ​ខ្ពស់​ពី​សុវត្ថិភាព​អ្នក​ដំណើរ​ធ្វើ​យ៉ាង​ណាដឹកជញ្ជូនពលរដ្ឋឱ្យបានដល់គោលដៅប្រកបដោយសុខសុវត្ថិភាព។

ប្រជាពលរដ្ឋ បានសម្ដែងអារម្មណ៍រំភើបរីករាយ និងថ្លែងអំណរគុណដល់សម្ដេចមហាបវរធិបតី ហ៊ុន ម៉ាណែត ដែលបានផ្ដល់រថយន្តក្រុងឱ្យពួកគាត់បានជិះទៅមកដោយមិនបង់ប្រាក់។ ប្រជា​ពលរដ្ឋបានអះអាងថា ការធ្វើដំណើរ​តាម​រថយន្ត​ក្រុង​ដែល​រាជរដ្ឋាភិបាល​ផ្ដល់​ឱ្យ​ក្នុង​ឱកាស​ពិធី​បុណ្យ​ចូលឆ្នាំ​ខ្មែរ​បានធ្វើឱ្យពួកគាត់កាត់បន្ថយការចំណាយថ្លៃធ្វើដំណើរ និងចំណេញថវិកាច្រើន ជា​ពិសេស​ការ​ធ្វើដំណើរ​ប្រកប​ដោយ​ផាសុខភាព​ក្រោម​ការយក​ចិត្ត​ទុកដាក់​ពីតៃកុង​ឡាន​គ្រប់​ពេល​វេលា​។

សូមបញ្ជាក់ថា សម្រាប់ខ្សែរត់តាមបណ្ដោយផ្លូវជាតិលេខ៥ភ្នំពេញ-បាត់ដំបង និងបាត់ដំបង-ភ្នំពេញ​ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត បាន​ផ្ដល់​រថយន្ត​ក្រុង​ចំនួន​៦៥​គ្រឿង សម្រាប់ដឹកជញ្ជូនប្រជាពលរដ្ឋមកលេងស្រុកកំណើត និងត្រឡប់​ទៅ​បំពេញ​ការងារ​វិញ​ដោយឥតគិតថ្លៃក្នុងឱកាសពិធីបុណ្យចូលឆ្នាំខ្មែរ៕