ភ្នំពេញ៖ លោក ទូច សុខៈ អ្នកនាំពាក្យរងក្រសួងមហាផ្ទៃ ថ្លែងថា ពិធីបុណ្យចូលឆ្នាំ​ប្រពៃណីជាតិ​ខ្មែរ​រយៈពេល៤ថ្ងៃ គឺចាប់ពីថ្ងៃទី១៣ ដល់ទី១៦ ខែមេសា ឆ្នាំ២០២៤ ទោះបីជាមានពលរដ្ឋ ភ្ញៀវទេសចរ​ជាតិ និងអន្តរជាតិ បានដើរលេងកម្សាន្តនៅទូទាំងប្រទេសយ៉ាងច្រើនកុះករ ប៉ុន្តែការ​គ្រប់គ្រង​សន្តិសុខ គឺមានភាពល្អប្រសើរ ។

អ្នកនាំពាក្យក្រសួងមហាផ្ទៃរូបនេះ នៅថ្ងៃទី១៧ ខែមេសា ឆ្នាំ២០២៤នេះ បានឲ្យដឹងថា ក្នុង​អំឡុង​ពិធី​បុណ្យចូលឆ្នាំទាំង ៤ថ្ងៃ កងកម្លាំងត្រូវបានដាក់ពង្រាយ នៅតាមគោលដៅសំខានៗ ដើម្បី​ជួយ​រក្សាការពារសន្តិសុខសណ្ដាប់ធ្នាប់ជូនប្រជាពលរដ្ឋ និងភ្ញៀវទេសចរដើរលេងកម្សាន្ត ក៏​ដូចជាការជួយសម្រួលដល់ការធ្វើចរាចរណ៍ ។

លោកបានបន្តថា ក្នុងរយៈពេលដដែលនេះ បញ្ហាសន្តិសុខសង្គម គឺមិនមានអ្វីគួរឲ្យកត់សម្គាល់ និង​ព្រួយ​បារម្ភនោះទេ ហើយចំពោះបញ្ហាបទល្មើសផ្សេងៗដែលបានកើតឡើងវិញ ក៏​ត្រូវ​បាន​សមត្ថកិច្ច​ចំណុះក្រសួងមហាផ្ទៃ បង្ក្រាបបានចំនួន៧៩ករណី ស្មើនឹងជាង៩៩ភាគរយ ដោយ​ឃាត់​ខ្លួន​អ្នក​ពាក់ព័ន្ធ១៥០នាក់ ។

លោក ទូច សុខៈ បានបន្ថែមថា កំឡុងចូលឆ្នាំខ្មែរទាំង ៤ថ្ងៃនេះ មាន​បញ្ហា​គ្រោះ​ថ្នាក់​ចរាចរណ៍​នៅ​ទូទាំង​ប្រទេស បានកើតឡើងចំនួន ៦៤ករណី បណ្ដាលឲ្យមានមនុស្សបាត់បង់ជីវិតចំនួន ៣៧​នាក់ និងរបួសធ្ងន់ស្រាលចំនួន ៨៨នាក់ ។

បើប្រៀប​ធៀបនឹងចំនួនករណីគ្រោះថ្នាក់ចរាចរណ៍ ក្នុងពិធីបុណ្យចូលឆ្នាំ ប្រពៃណីជាតិ​ដែល​មាន​រយៈ​ពេល​៣​ថ្ងៃ ដូចឆ្នាំមុន ពិនិត្យឃើញថា ករណីគ្រោះថ្នាក់​ចរាចរណ៍​បាន​កើត​ឡើង​សរុប​ចំនួន​៤៧​ករណី គឺកើនឡើងចំនួន ២ករណី ដែលបណ្តាលឱ្យមនុស្សស្លាប់សរុបចំនួន ២៥នាក់ កើន​ឡើង​ចំនួន​១នាក់ និងរងរបួសធ្ងន់ស្រាលសរុបចំនួន៦៦នាក់ ថយចុះចំនួន២៦នាក់ ។ មូល​ហេតុ​បង្ក​ឲ្យ​មាន​គ្រោះថ្នាក់ រួមមាន បើកបរក្នុងល្មើសល្បឿន, មិនគោរពសិទ្ធិ, មិនប្រកាន់ស្តាំ, បើកបរ​ក្នុង​ស្ថាន​ភាព​ស្រវឹង, ប្រជែងគ្រោះថ្នាក់, បត់គ្រោះថ្នាក់ និងកត្តាយានយន្ត ។

អ្នកនាំពាក្យ​ក្រសួងមហាផ្ទៃដដែល បានបញ្ជាក់ថា ថ្ងៃបុណ្យចូលឆ្នាំប្រពៃណីជាតិទាំង៤ថ្ងៃនេះ ចំពោះ​បញ្ហាអគ្គិភ័យនៅទូទាំងប្រទេស បានកើតឡើងចំនួន ២២ករណី ក្នុងនោះឆេះផ្ទះចំនួន ១៦ខ្នង, ឃ្លាំងចំនួន២, រោងចំនួន១, កាស៊ីណូចំនួន១, ចំការចំនួន១ និងទីតាំងមួយចំនួនទៀត ៕ អត្ថបទ បាន សុខរិទ្ធិ