នគរបាល នៅថ្ងៃពុធ (១៧ មេសា) នេះ បានឲ្យដឹងថា ភ្នាក់ងារស៊ើបអង្កេតអាហ្វ្រិកខាងត្បូង កំពុងស្រាវជ្រាវការស្លាប់របស់មនុស្ស ៥នាក់ នៅក្នុងសង្កាត់ Khayelitsha របស់ទីក្រុង Cape Town បន្ទាប់ពីមានហេតុការណ៍បាញ់ប្រហារមួយ។

ការិយាល័យនគរបាលអាហ្រ្វិកខាងត្បូងបានឲ្យដឹងនៅក្នុងសេចក្តីថ្លែងការណ៍មួយថា៖ «នៅម៉ោងប្រហែល ៦:០០ (ត្រូវនឹងម៉ោង ៤:០០ ម៉ោងសកល) នគរបាលត្រូវបានហៅតាមទូរសព្ទឲ្យទៅកាន់កន្លែងកើតហេតុការណ៍បាញ់ប្រហារ នៅផ្លូវ Ncumu ជាកន្លែងដែលសពបុរស ៤នាក់ និងស្ត្រីម្នាក់ ត្រូវបានប្រទះឃើញ ដោយជនរងគ្រោះមានស្នាមរបួសដោយគ្រាប់កាំភ្លើង»។

នគរបាលបានបន្ថែមថា ការស្លាប់អាចជាប់ទាក់ទងនឹងឧប្បត្តិហេតុមួយ នៅព្រឹកព្រលឹមថ្ងៃដែលមនុស្សម្នាក់ទៀត ត្រូវបានបាញ់សម្លាប់នៅក្នុងបរិវេណជាមួយគ្នានេះ។ យ៉ាងណាក្ដី នគរបាលមិនទាន់កំណត់អត្តសញ្ញាណជនរងគ្រោះ ឬមូលហេតុនៃការបាញ់ប្រហារនេះនៅឡើយទេ៕