ប្រទេសចិន នៅថ្ងៃពុធ (១៧ មេសា) បាននិយាយថា សមយុទ្ធយោធារួមគ្នារបស់កងកម្លាំងហ្វីលីពីន និងសហរដ្ឋអាមេរិក នៅសមុទ្រចិនខាងត្បូង នឹងនាំឲ្យមាន «អសន្តិសុខកាន់តែខ្លាំងឡើង» សម្រាប់ទីក្រុងម៉ានីល។

ហ្វីលីពីន និងសហរដ្ឋអាមេរិកកំពុងធ្វើសមយុទ្ធប្រចាំឆ្នាំរួមគ្នា ឈ្មោះ «Balikatan» ឬ «ស្មាប្រកៀកស្មា» ដែលត្រូវចាប់ផ្តើមនៅសប្តាហ៍ក្រោយ ពីថ្ងៃទី២២ ខែមេសា ដល់ថ្ងៃទី១០ ខែឧសភា ដែលពួកគេនឹងធ្វើសមយុទ្ធដោយសន្មតិដណ្តើមយកកោះកាន់កាប់ដោយសត្រូវក្នុងតំបន់ដែលនៅទល់មុខនឹងកោះតៃវ៉ាន់ និងសមុទ្រចិនខាងត្បូង។

នៅក្នុងសន្និសីទសារព័ត៌មានដែលតែងធ្វើជាប្រចាំ អ្នកនាំពាក្យក្រសួងការបរទេសចិន លោក Lin Jian បាននិយាយថា៖ «ការប៉ុនប៉ងនាំយកកងកម្លាំងពីខាងក្រៅ ដើម្បីការពារអ្វីដែលគេហៅថា សន្តិសុខនោះ នឹងត្រឹមតែនាំឲ្យមានភាពអសន្តិសុខកាន់តែខ្លាំងឡើង សម្រាប់ខ្លួនឯងផ្ទាល់ប៉ុណ្ណោះ»។

ជាមួយគ្នានេះ លោក Lin ក៏បានព្រមានដែរថា ហ្វីលីពីនគួរតែ «មានភាពប្រកដប្រជាឲ្យបានគ្រប់គ្រាន់ ដើម្បីទទួលស្គាល់» ថា ការនាំយកប្រទេសក្រៅដែនដី ដើម្បីបង្ហាញកម្លាំងរបស់ខ្លួន នៅក្នុងសមុទ្រចិនខាងត្បូង និងបង្កឲ្យមានការប្រឈមមុខដាក់គ្នា នឹងធ្វើឲ្យភាពតានតឹងកាន់តែធ្ងន់ធ្ងរ និងបំផ្លាញស្ថិរភាពក្នុងតំបន់៕