រដ្ឋបាលរបស់លោក Biden បាននិយាយថា ខ្លួននឹងមិនបន្តអាជ្ញាប័ណ្ណដែលនឹងត្រូវផុតកំណត់នៅព្រឹកថ្ងៃព្រហស្បតិ៍ ទី១៨ ខែមេសានេះទេ ដែលបានបន្ធូរបន្ថយទណ្ឌកម្មប្រេងលើប្រទេសវេណេហ្ស៊ុយអេឡា ខណៈមានចំណាត់ការដាក់ទណ្ឌកម្មឡើងវិញក្នុងការឆ្លើយតបទៅនឹងការខកខានរបស់ប្រធានាធិបតី លោក Nicolas Maduro ក្នុងការសន្យាបោះឆ្នោត។

ប៉ុន្មានម៉ោងមុនពេលផុតកំណត់ ក្រសួងរតនាគារសហរដ្ឋអាមេរិក បានប្រកាសកាលពីថ្ងៃពុធ ថាក្រសួងបានចេញអាជ្ញាប័ណ្ណជំនួស ដែលផ្តល់ឱ្យក្រុមហ៊ុនជាច្រើន រយៈពេលល៤៥ថ្ងៃ ដើម្បីកាត់បន្ថយប្រតិបត្តិការ និងការធ្វើពាណិជ្ជកម្មរបស់ពួកគេនៅក្នុងវិស័យប្រេង និងឧស្ម័នរបស់ប្រទេសផលិតប្រេងនៃអង្គការOPEC។

និយាយនៅកន្លែងជួបជុំមួយ មេដឹកនាំគណបក្សប្រឆាំង លោកស្រី ម៉ារីយ៉ា កូរីណា ម៉ាឆាដូ(Maria Corina Machado) ដែលត្រូវបានរារាំងមិនឱ្យឈរឈ្មោះក្នុងការបោះឆ្នោត បាននិយាយថា រដ្ឋាភិបាលពុំបានគោរពតាមការសន្យាទាំងអស់ដែលខ្លួនបានធ្វើនោះទេ។

លោក ចច រ៉ូទ្រីហ្គូស(Jorge Rodriguez) ប្រធានសភាគាំទ្ររដ្ឋាភិបាលរបស់ប្រទេសវេណេហ្ស៊ុយអេឡា បាននិយាយថា ទីក្រុងការ៉ាកាស់ បានបំពេញលក្ខខណ្ឌនៃកិច្ចព្រមព្រៀងកាលពីឆ្នាំមុន ហើយ ការដាក់ទណ្ឌកម្មឡើងវិញនេះ បង្ហាញថាសហរដ្ឋអាមេរិកកំពុងប្រឆាំងទៅនឹងការបោះឆ្នោតដោយសេរីនៅក្នុងប្រទេសវ៉េណេហ្ស៊ុយអេឡា។