យោងតាមប្រភពនានា បានឲ្យដឹងថា នៅខែមិថុនាខាងមុខនេះ រដ្ឋាភិបាលជប៉ុននឹងចាប់ផ្តើមការធ្វើតេស្តបង្ហាញពីការប្រើប្រាស់ជាក់ស្តែងរបស់យានដ្រូនក្រោមទឹកស្វ័យប្រវត្តិ (AUV) ។
ទោះបីជាយាន AUV ដែលអាចរុករកដោយស្វ័យប្រវត្តិនៅក្រោមទឹក ត្រូវបានគេរំពឹងថា នឹងប្រើប្រាស់ក្នុងវិស័យអភិវឌ្ឍន៍ធនធានសមុទ្រ និងសន្តិសុខជាតិក៏ដោយ ក៏ក្រុមហ៊ុនឯកជនមិនទាន់បានហក់ចូលទីផ្សារនេះដែរ ដោយសារតែការចំណាយផលិតកម្មខ្ពស់ និងកង្វះបទពិសោធន៍ក្នុងការប្រើប្រាស់។
AUV ឬហៅម្យ៉ាងទៀតថា យានដ្រូននៅក្រោមទឹកនោះ ត្រូវបានគេរំពឹងថា នឹងប្រើប្រាស់នៅក្នុងទឹកដែលមានគ្រោះថ្នាក់ និងតំបន់សមុទ្រជ្រៅៗ ដែលមានសម្ពាធទឹកខ្ពស់។ តម្លៃផលិតកម្មក្នុងមួយគ្រឿង មានចាប់ពីរាប់សិបលានយ៉េន រហូតដល់ជាង ១ពាន់លានយ៉េន (ជាង ៦លានដុល្លារអាមេរិក)។
រដ្ឋាភិបាលរំពឹងថា AUV ឬយានដ្រូនក្រោមទឹកស្វ័យប្រវត្តិនេះ នឹងត្រូវបានប្រើប្រាស់ សម្រាប់គោលបំណងជាច្រើន ដូចជាការត្រួតពិនិត្យកន្លែងផលិតថាមពលខ្យល់នៅសមុទ្រ និងសកម្មភាពឃ្លាំមើលក្រោមទឹក និងសកម្មភាពប្រុងប្រយ័ត្ន។ យាននេះគ្រោងនឹងដាក់ឲ្យប្រើប្រាស់ជាក់ស្តែងនៅឆ្នាំ២០៣០។
ដោយមើលឃើញពីការពង្រីកដែនសមុទ្ររបស់ចិន ជប៉ុនក៏នឹងពង្រឹងសមត្ថភាពឃ្លាំមើល និងការប្រុងប្រយ័ត្នក្រោមបាតសមុទ្ររបស់ខ្លួនផងដែរ ដូចជាការស្វែងរកវត្ថុគួរឲ្យសង្ស័យជាដើម។ រដ្ឋាភិបាលក៏កំពុងពិចារណាប្រើប្រាស់ AUV នេះ សម្រាប់ការស្រាវជ្រាវប្រព័ន្ធអេកូឡូស៊ី និងគុណភាពទឹកផងដែរ៕