កម្មវិធីផ្ញើសារ Telegram ទទួលបានអ្នកប្រើប្រាស់សកម្មជាង ៩០០លាននាក់ហើយ ហើយគួរតែឡើងដល់ចំនួន ១ពាន់លាននាក់ ក្នុងរង្វង់រយៈពេល ១ឆ្នាំ។ នេះបើតាមការឲ្យដឹងពីស្ថាបនិករបស់កម្មវិធីនេះ គឺលោក Pavel Durov ដែលបាននិយាយនៅក្នុងបទសម្ភាសន៍មួយចេញផ្សាយកាលពីថ្ងៃពុធ (ទី១៧ ខែមេសា)។
នៅក្នុងបទសម្ភាសន៍ដ៏កម្រមួយជាមួយពិធីកររបស់អាមេរិក គឺលោក Tucker Carlson លោក Durov ជនជាតិរុស្សីដែលបង្កើតក្រុមហ៊ុននេះជាមួយបងប្រុសរបស់លោកឈ្មោះ Nikolai Durov បាននិយាយថា៖ «អេប Telegram កំពុងរីករាលដាលដូចអណ្ដាតភ្លើងឆាបឆេះព្រៃអញ្ចឹង។ អ្នកប្រើប្រាស់ ២លានកន្លះ ចុះឈ្មោះរៀងរាល់ថ្ងៃ»។
លោក Durov បានប្រាប់ពិធីករលោក Carlson ថា៖ «ប្រជាជនស្រឡាញ់ឯករាជ្យភាព។ ពួកគេក៏ស្រឡាញ់ភាពឯកជន សេរីភាព ហើយ(មាន) ហេតុផលជាច្រើនដែលហេតុអ្វីបានជាម្នាក់ៗ នឹងប្តូរទៅប្រើ Telegram វិញ»។
ក្រុមហ៊ុនអេបផ្ញើសារដែលមានមូលដ្ឋាននៅទីក្រុងឌូបៃ ប្រទេសអារ៉ាប់រួមនេះ បានតាំងខ្លួនឯងថា ជាជម្រើសជំនួសវេទិកាគ្រប់គ្រងដោយសហរដ្ឋអាមេរិក ដែលត្រូវបានរិះគន់ថា បានកេងប្រវ័ញ្ចពាណិជ្ជកម្មលើទិន្នន័យផ្ទាល់ខ្លួនរបស់អ្នកប្រើប្រាស់។ ហើយកម្មវិធី Telegram បានប្តេជ្ញាថា ខ្លួននឹងមិនបង្ហាញព័ត៌មានណាមួយអំពីអ្នកប្រើប្រាស់របស់ខ្លួនជាដាច់ខាត។
តែយ៉ាងណាក្ដី ដោយកម្មវិធី Telegram អនុញ្ញាតឲ្យក្រុមមានសមាជិករហូតដល់ ២០០.០០០នាក់ នាំឲ្យមានការចោទប្រកាន់ថា វានាំឲ្យមានភាពងាយស្រួល ក្នុងការធ្វើឲ្យមានព័ត៌មានមិនពិតរីករាលដាល ក៏ដូចជាងាយស្រួលដល់អ្នកប្រើប្រាស់ក្នុងការផ្សព្វផ្សាយខ្លឹមសារស្អប់ខ្ពើម កេងប្រវ័ញ្ចផ្លូវភេទកុមារ ឃុបឃិត និងភេរវករជាដើម៕