ទីភ្នាក់ងារសារព័ត៌មានរដ្ឋ Anadolu បានរាយការណ៍កាលពីថ្ងៃពុធ ដោយដកស្រង់ប្រភពការទូតថា រដ្ឋ    មន្ត្រីការបរទេសទួរគី លោក ហាកាន ហ្វីដាន (Hakan Fidan) បានជួបជាមួយប្រធានអង្គការសកម្មប្រយុទ្ធប៉ាឡេស្ទីនហាម៉ាស លោក អ៊ីស្មេល ហានីយ៉េ (Ismail Haniyeh) ក្នុងអំឡុងពេលដំណើរទស្សនកិច្ចទៅកាន់ប្រទេសកាតា។

សារព័ត៌មាន Anadolu បានរាយការណ៍ថា បញ្ហាដែលពួកគេពិភាក្សារួមមានបទឈប់បាញ់ នៅក្នុងសង្រ្គាមហ្កាហ្សា និងការដោះលែងចំណាប់ថ្នូរ។

របាយការណ៍ប្រព័ន្ធផ្សព្វផ្សាយបានឲ្យដឹងថា ប្រធានាធិបតីទួរគី លោករ៉េសិប តាយីប អឺដូហ្កាន់ ( Recep Tayyip Erdogan) ក៏ចង់ជួប លោកហានីយ៉េ នៅក្នុងប្រទេសទួរគី នៅចុងសប្តាហ៍នេះផងដែរ។

លោកអឺដូហ្កាន់ បានវាយប្រហាររដ្ឋាភិបាលរបស់នាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ ( Benjamin Netanyahu) ម្តងទៀតកាលពីថ្ងៃពុធ។ លោកបាននិយាយថា លោកណេតាន់យ៉ាហ៊ូ ជាអ្នកទទួលខុសត្រូវចំពោះការស្លាប់របស់កុមាររាប់ពាន់នាក់ ហើយ «តាំងពីយូរយារណាស់មកហើយ គឺស្លាប់លើសពីសម័យហ៊ីត្លែរទៅទៀត»។

លោកអឺដូហ្កាន់ បានប្រៀបធៀបលោកណេតាន់ហ៊ូម្តងហើយម្តងទៀត ទៅនឹងមេដឹកនាំណាហ្ស៊ី លោក អាដូហ្វ ហ៊ីត្លែរ (Adolf Hitler) កាលពីអតីតកាល ហើយបានចោទប្រកាន់ប្រមុខរដ្ឋាភិបាលអ៊ីស្រាអែលថា បានប្រព្រឹត្ត «ការសម្លាប់រង្គាល» នៅក្នុងតំបន់ហ្កាហ្សាស្ទ្រីប។ អ៊ីស្រាអែល បានច្រានចោលការថ្លែងរបស់លោកអឺដូហ្គែនម្តងហើយម្តងទៀតយ៉ាងម៉ឺងម៉ាត់។