លោកនាយករដ្ឋមន្ត្រី ដូណាល់ ថាស់ ( Donald Tusk) បាននិយាយនៅក្នុងទីក្រុងទីក្រុងវ៉ាសូវី កាលពីថ្ងៃអង្គារ បន្ទាប់ពីកិច្ចប្រជុំគណៈរដ្ឋមន្ត្រីស្តីពីសន្តិសុខជាតិថា ប្រទេសប៉ូឡូញ មានគោលបំណងធ្វើឲ្យប្រសើរឡើងនូវការការពារដែនអាកាសរបស់ខ្លួន រហូតដល់ប្រទេសនេះ «មានសុវត្ថិភាពដូចអ៊ីស្រាអែល»។
លោកថាស់ បានកត់សម្គាល់ថា អ៊ីស្រាអែលបានស្ទាក់ចាប់មីស៊ីល និងយានដ្រូនស្ទើរតែទាំងអស់ ដែលបានបាញ់មកលើខ្លួន ដោយអ៊ីរ៉ង់កាលពីចុងសប្តាហ៍ ខណៈដែលអ៊ុយក្រែន ដែលជាអ្នកជិតខាងរបស់ប៉ូឡូញនៅភាគខាងត្បូង គឺអាចស្ទាក់ចាប់បានត្រឹមតែមួយភាគបីនៃមីស៊ីលរបស់រុស្ស៊ីប៉ុណ្ណោះ។
លោកបាននិយាយថា៖«ភារកិច្ចរបស់យើងសព្វថ្ងៃនេះ កំពុងប្រើប្រាស់គ្រប់ប្រព័ន្ធសម្រាប់ការពារដែនអាកាសប៉ូឡូញ ដើម្បីធ្វើឲ្យប៉ូឡូញមានសុវត្ថិភាពដូចអ៊ីស្រាអែល»។ លោកបានបន្ថែមថា ការសន្និដ្ឋានដែលត្រូវទាញនោះ គឺថា ដែនអាកាស ត្រូវតែត្រូវបានគ្រប់គ្រង ដើម្បីកែលម្អសន្តិសុខរបស់ប្រទេស ប៉ូឡូញ។
លោកថាស់ បានបន្តថា ប្រទេសប៉ូឡូញ ចាប់អារម្មណ៍ក្នុងការចូលរួមក្នុងគំនិតផ្តួចផ្តើម «European Sky Shield» របស់អាល្លឺម៉ង់ ដែលនឹងរួមបញ្ចូលប្រទេសអឺរ៉ុបមួយចំនួន ដែលបានទទួលមីស៊ីល Iris-T របស់អាល្លឺម៉ង់ ក្នុងគោលបំណងធានាសុវត្ថិភាពដែនអាកាសអឺរ៉ុប។
ប៉ូឡូញជាសម្ព័ន្ធមិត្តយោធាដ៏រឹងមាំរបស់អ៊ុយក្រែនក្នុងការកិច្ចប្រឹងប្រែងប្រយុទ្ធប្រឆាំងនឹងការឈ្លានពានរបស់រុស្ស៊ី ក្នុងរយៈពេលពីរឆ្នាំកន្លងមកនេះ។ វាក៏ជាមជ្ឈមណ្ឌលដ៏សំខាន់មួយសម្រាប់ការចែកចាយសព្វាវុធរបស់លោកខាងលិចដល់អ៊ុយក្រែនផងដែរ។ ដូច្នេះប៉ូឡូញ ត្រូវបានរុស្ស៊ីមើលឃើញថា ជាសត្រូវដ៏មានសក្តានុពល។
អាល្លឺម៉ង់ បានផ្តល់ឲ្យអ៊ុយក្រែននូវប្រព័ន្ធមីស៊ីល Iris-T ហើយបានសន្យាផ្តល់ការដឹកជញ្ជូនបន្ថែមទៀត។