ខណៈដែលឥណ្ឌាចាប់ផ្តើមបោះឆ្នោតនៅក្នុងការបោះឆ្នោតសកល ៧ដំណាក់កាល នាថ្ងៃទី១៩ ខែមេសា គណៈកម្មាធិការបោះឆ្នោតរបស់ប្រទេសដែលមានប្រជាជនច្រើនជាងគេបំផុតលើពិភពលោក នៅថ្ងៃព្រហស្បតិ៍ (ទី១៨ ខែមេសា) បានឈានចូលដល់ដំណាក់កាលចុងក្រោយនៃការរៀបចំរបស់ខ្លួន។
ក្រុមអ្នករៀបចំការបោះឆ្នោតត្រូវបានបញ្ជូនទៅកាន់ទីតាំងនានាជាមួយសម្ភារៈសម្រាប់ការបោះឆ្នោត ដែលរួមមានម៉ាស៊ីនបោះឆ្នោតអេឡិចត្រូនិក (EVM) ហិបឆ្នោត អង្គភាពត្រួតពិនិត្យ និងឯកសារសំខាន់ៗផ្សេងទៀតដែលត្រូវការដើម្បីរៀបចំដំឡើងបន្ទប់បោះឆ្នោត នៅទូទាំងមណ្ឌលបោះឆ្នោត។
សន្តិសុខត្រូវបានពង្រឹង ហើយមន្ត្រីរៀបចំការបោះឆ្នោតប្រចាំតំបន់ បានត្រួតពិនិត្យមើលមន្ត្រីបោះឆ្នោត ដើម្បីធានាឲ្យមានដំណើរការបោះឆ្នោតដោយរលូន សុវត្ថិភាព និងយុត្តិធម៌។
នៅក្នុងរដ្ឋ Manipur ភាគឦសាន ដែលញាំញីដោយជម្លោះ យ៉ាងហោចណាស់តំបន់ងាយរងគ្រោះចំនួន ៧០ ត្រូវបានកំណត់ថា ជាកន្លែងដែលកាមេរ៉ាសុវត្ថិភាព (CCTV) កំពុងត្រូវបានដំឡើង ក្នុងគោលបំណងត្រួតពិនិត្យការិយាល័យបោះឆ្នោត ដើម្បីឲ្យមានការបោះឆ្នោតប្រកបដោយសុវត្ថិភាព។
យ៉ាងណាក្ដី រដ្ឋ Manipur ដែលមានតែ ២អាសនៈ២ និងដែលអាសនៈទាំង២ នោះ ត្រូវធ្លាក់ទៅក្នុងដៃរបស់គណបក្ស BJP របស់នាយកមន្ត្រី លោក Narendra Modi និងសម្ព័ន្ធមិត្ត អំឡុងការបោះឆ្នោតឆ្នាំ២០១៩ នោះ ជះឥទ្ធិពលតិចតួចលើនយោបាយជាតិ និងសភាដែលមាន ៥៤៣អាសនៈ។ ហើយសេចក្តីថ្លែងការណ៍របស់គណបក្ស BJP ក៏មិននិយាយដល់រដ្ឋនេះដែរ៕