លោក Vitor Gaspar ដែលជាប្រធាននាយកដ្ឋានកិច្ចការសារពើពន្ធរបស់មូលនិធិរូបិយវត្ថុអន្តរជាតិ (IMF) បាននិយាយថា នវានុវត្តន៍បានក្លាយជាកម្លាំងចលករដល់ការស្ទុះងើបឡើងវិញ និងការវិវត្តប្រកបដោយស្ថិរភាពនៃសេដ្ឋកិច្ច នៅក្នុងប្រទេសចិន។
លោក Gaspar បានធ្វើការកត់សម្គាល់បែបនេះ អំឡុងកិច្ចប្រជុំនិទាឃរដូវឆ្នាំ២០២៤ របស់ IMF និងធនាគារពិភពលោក នៅទីក្រុង Washington DC សហរដ្ឋអាមេរិក។
លោក Gaspar បាននិយាយថា៖ «នវានុវត្តន៍ និងការបង្ហាញពីកម្លាំងផលិតភាពគុណភាពថ្មី គឺជាអាទិភាពសំខាន់ចម្បងសម្រាប់ប្រទេសចិន ហើយការសង្កត់ធ្ងន់លើនវានុវត្តន៍ គឺជារឿងសមហេតុផល ព្រោះប្រទេសចិនអាចសម្រេចបាននូវសមិទ្ធផលមួយចំនួន ដូចជាការផលិតថាមពលបៃតង។ សូមស្រមៃពីផ្ទាំងសូឡាសាកមើល។ ប្រទេសចិន គឺជាអ្នកនាំមុខគេ ក្នុងការផលិតផ្ទាំងសូឡា។ ហើយសូមគិតពីរថយន្តអគ្គិសនី»។
លោកបានប្រាប់ទៀតថា នាពេលបច្ចុប្បន្ននេះ ប្រទេសជាច្រើនកំពុងប្រឹងប្រែងយ៉ាងសកម្មទទួលយកនវានុវត្តន៍ និងលើកកម្ពស់ការផ្លាស់ប្តូរបៃតង និងកាបូនទាប ដែលបង្ហាញពីសារៈសំខាន់នៃកិច្ចសហប្រតិបត្តិការសកល។ លោក Gaspar បានបន្ថែមថា លោកសង្ឃឹមថា ប្រទេសចិននឹងបន្តដើរតួនាទីវិជ្ជមាន នៅក្នុងវិស័យទាំងនេះ៕