ខណ:ដែលទឹកជំនន់បានជន់លិចមួយភាគធំនៃប្រទេសរុស្ស៊ីភាគកណ្ដាលនោះ អ្នកស្រុកភូមិមួយ បានផ្គើននឹងការផ្ដល់យោបល់ឱ្យជម្លៀសខ្លួនចេញពីលំនៅឋានរបស់ពួកគេ និងបានចាប់ផ្ដើមធ្វើទំនប់ទឹកមួយដោយខ្លួនឯង។
អ៊ីវ៉ាន់ ឈើណូម៉ូរេត (Ivan Chernomorets) ជាអ្នកស្រុកនៃភូមិប៉េរ៉ូស្គី (Perosky)ជិតក្រុង អូរិនប៊ើគ(Orenburg) បាននិយាយថា បន្ទាប់ពីជម្លៀសកុមារ និងមនុស្សចាស់ កាលពីសប្ដាហ៍មុនមក អ្នកស្រុក១ក្រុម មានគ្នា ពី២០ទៅ៣០នាក់បានចាប់ផ្ដើមសាងសង់ជញ្ជាំងដី ដែលលាតសន្ធឹងប្រវែង១.៤៤០ម៉ែត ។
លោកឈើណូម៉ូរេត បានប្រាប់អ្នកសារព័ត៌មានReutersថា បន្ទាប់ពីទឹកចាប់ផ្ដើមហក់ឡើង យើងដឹងថា យើងមិនអាចទប់បានដោយខ្លួនឯងតែម្នាក់ឡើយ ហើយយើងបានចាប់ផ្ដើមជួលឧបករណ៍កាយដី។ ត្រង់ចំណុចនេះ ទឹកបានឡើងប្រមាណជា១ម៉ែតក្នុងរយ:ពេល២ថ្ងៃ។
លោកបាននិយាយថា អ្នកភូមិផ្សេងទៀត បានឆ្លៀតពេលសម្រាកពីការងារមកចូលរួមលើកទំនប់ ដោយសកម្មភាពកើនឡើងខ្ពស់នៅសប្ដាហ៍ចុងក្រោយនេះ មានមនុស្សប្រមាណ២០០នាក់ បានមកចូលរួមធ្វើការ២៤ម៉ោងលើ២៤ម៉ោង ជាមួយនឹងអ្នកស្រុកផ្សេងទៀត ដែលផ្ដល់អាហារអោយ។
អ្នកស្រុកបាននិយាយថា ការលើកទំនប់នេះ បានរារាំងទឹកជំនន់ពីការហ៊ុមព័ទ្ធក្នុងតំបន់ធំមួយ ដែលមានលំនៅឋាន អាគារផ្ទះល្វែង សាលាមត្តេយ្យ និងមណ្ឌលវេជ្ជសាស្ត្រមួយ។
តំបន់អ៊ូរ៉ល់(Urals)របស់រុស្ស៊ី និងភាគខាងជើងប្រទេសកាហ្សាក់ស្ថាន កំពុងជួបប្រទះគ្រោះទឹកជំនន់ដ៏អាក្រក់បំផុតមិនធ្លាប់មាន ខណ:ដែល ព្រឹល១ភាគធំបានរលាយភ្លាមៗ ហើយភ្លៀងខ្លាំងបានធ្លាក់មកលើដីដែលបង្កអោយមានទឹកជំនន់រួចទៅហើយនៅមុនរដូវរងាចូលមកដល់។
អភិបាលតំន់អូរិនប៊ើគ(Orenburg)លោក ដេនីស ប៉ាសលើ (Denis Pasler) បាននិយាយកាលពីថ្ងៃពុធថា ក្រសួងគ្រាអាសន្នកោតសសើរចំពោះ ការរៀបចំដែលមានកម្រិតខ្ពស់ពីការងារបន្ថយទឹកជំនន់ក្នុង
តំបន់។ លោកប៉ាសលើបន្ដថា កិច្ចប្រឹងប្រែងសំអាតនៅតែបន្ដធ្វើ ហើយការសងការខូចខាតនឹងត្រូវផ្ដល់អោយប្រជាជនដែលទទួលរងគ្រោះ៕