រហូតមដល់បច្ចុប្បន្នកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១លាន៥សែននាក់ ជូនយុវជនទូទៅ និងយុវជនមកពីគ្រួសារក្រីក្រ និងគ្រួសារងាយរងហានិភ័យ ដំណាក់កាលដំបូង គឺជិតឈានចូលដល់ថ្ងៃបញ្ចប់ ហើយមានក្រុមហ៊ុន សហគ្រាសមួយចំនួន បានកាលបរិច្ឆេទចុះសម្ភាសយុវជនទាំងនោះទៅធ្វើការហាត់ការ បម្រើការងារ ខណៈមានយុវជនខ្លះទៀតកំពុងធ្វើការងារបានប្រាក់ចំណូលជាបណ្តើរៗហើយ។
បើតាមលោក ច្រឹង ណារី នាយកវិទ្យាស្ថានជាតិពហុបច្ចេកទេសតេជោសែន បានថ្លែងថា ដោយមានកិច្ចសហការទំនាក់ទំនងគ្នាល្អរវាង វិទ្យាស្ថាន និងទីភ្នាក់ងារជាតិមុខរបរ និងការងារ និងបណ្តាក្រុមហ៊ុនសហគ្រាសតូចធំនានា មកដល់ពេលនេះ គឺមានបណ្តាក្រុមហ៊ុនសហគ្រាសតូចធំនានានោះ បានកំណត់កាលបរិច្ឆេទមកសម្ភាស ជ្រើសរើសយុវជនដែលរៀនជិតចប់ជំនាញវិជ្ជាជីវៈ អាហារូបករណ៍រាជរដ្ឋាភិបាល ក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១.៥ M យកទៅហាត់ការ បម្រើការងារជាបណ្តើរៗ ខណៈ អំឡុងពេលនេះដែរ ក៏មានយុវជនមួយចំនួនបាន និងកំពុងចុះធ្វើការងារទៅតាមជំនាញរបស់ខ្លួនជាបណ្តើរៗ ដើម្បីទទួលបានបទពិសោធន៍ការងារផង ក៏បានថវិកាខ្លះជួយដល់គ្រួសារកំពុងជួបការខ្វះខាត។
បើតាមម្ចាស់យានដ្ឋានទី មួយហេង នៅក្រុងតាខ្មៅ និងក្រុមយុវជន ថ្លែងថា បច្ចុប្បន្នយើងកំពុងមានតម្រូវការខ្លាំងជ្រើសរើសក្រុមយុវជនរៀនចេះជំនាញជួសជុលឡានស្រាប់ មកធ្វើការងារក្នុងយានដ្ឋាន ខណៈការជ្រើសរើសកូនជាង ដែលមានជំនាញវិជ្ជាជីវៈស្រាប់នោះ គឺងាយស្រួល មិនលំបាកណែនាំការជួសជុល ហើយមានការផ្តល់សេវាប្រកបសេចក្តីទំនុកចិត្ត និងមានគុណភាពល្អ ។
សូមបញ្ជាក់ថា វិទ្យាស្ថានពហុបច្ចេកវិទ្យាតេជោ សែន ក្រុងតាខ្មៅ ខេត្តកណ្តាល ក៏ដូចសាលា TVET នានាទៀត បានកំពុងបន្តជ្រើសរើសសិស្ស ចូលរៀនថ្នាក់អាហារូបករណ៍ ក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១លាន៥សែននាក់ ដំណាក់កាលទី២ ខណៈវគ្គបណ្តុះបណ្តាលដំណាក់កាលទី១ មានជំនាញមួយចំនួននឹងរៀនចប់នៅក្នុងដំណាច់ខែមេសានេះ ហើយជំនាញមួយចំនួនទៀតរៀនបញ្ចប់នៅក្នុងខែមិថុនានេះ៕ អត្ថបទ ស៊ុម សុខជា