អាមេរិក៖ លោក​ប្រធានាធិបតី​អាមេរិក Joe Biden បាន​និយាយថា​ កងកម្លាំង​ប្រយុទ្ធ​របស់​សហរដ្ឋ​អាមេរិក​នឹង​ចាក​ចេញពី​ប្រទេស​អ៊ីរ៉ាក់​នៅ​ដំណាច់​ឆ្នាំនេះ ទោះបី​កងទ័ព​នឹង​បន្ត​បណ្ដុះបណ្ដាល ​និង​ផ្តល់​ការ​ប្រឹក្សា​ដល់​យោធា​អ៊ីរ៉ាក់​ក៏ដោយ​។​

​ការប្រកាស​នេះ​ធ្វើឡើង​បន្ទាប់ពី​លោក Biden បាន​ជួបពិភាក្សា​ជាមួយ​នាយករដ្ឋមន្ត្រី​អ៊ីរ៉ាក់ Mustafa al-Kadhimi នៅ​ឯ​សេត​វិមាន​។​ ប្រធានាធិបតី​សហរដ្ឋអាមេរិក​ និង​នាយករដ្ឋមន្ត្រី​អ៊ីរ៉ាក់​បាន​ចុះ​កិច្ច​ព្រម​ព្រៀង​បញ្ចប់​បេសកកម្ម​ប្រយុទ្ធ​។​ បច្ចុប្បន្ន​មាន​កងទ័ព​អាមេរិក​ចំនួន ២.៥០០​នាក់​នៅ​ក្នុង​ប្រទេស​អ៊ីរ៉ាក់​កំពុង​ជួយ​កងកម្លាំង​ក្នុង​តំបន់ ​ប្រឆាំង​នឹង​អ្វី​ដែល​នៅសល់​ពី​ក្រុម​រដ្ឋ​អ៊ីស្លាម​។​ ​ចំនួន​ទាហាន​អាមេរិក​ទំនងជា​នៅតែ​ដដែល​ ប៉ុន្តែ​សកម្មភាព​នេះ​ត្រូវ​បាន​គេ​មើល​ឃើញ​ថា ​ជា​ការ​ប៉ុនប៉ង​ជួយ​ដល់​នាយករដ្ឋមន្ត្រី​អ៊ីរ៉ាក់​។​

​វត្តមាន​របស់​អាមេរិក​នៅ​អ៊ីរ៉ាក់​បាន​ក្លាយ​ជា​បញ្ហា​ធំ​មួយ ​ចាប់​តាំង​ពី​ឧ​ត្ត​ម​សេនីយ៍​ជាន់ខ្ពស់​របស់​អ៊ីរ៉ង់ ​លោក Qasem Soleimani និង​មេដឹកនាំ​ក្រុម​ជីវពល​មូស្លីម​ដែល​គាំទ្រ​ដោយ​អ៊ីរ៉ង់ ​ត្រូវ​បាន​សម្លាប់​នៅ​ក្នុង​ការវាយប្រហារ​ដោយ​យាន​ដ្រូ​ន​របស់​អាមេរិក ​នៅ​រដ្ឋ​ធានី​បា​ដា​ដ​កាលពី​ឆ្នាំមុន​។​ ​គណបក្ស​នយោបាយ​ដែល​មាន​សម្ព័ន្ធភាព​ជាមួយ​អ៊ីរ៉ង់ ​បាន​ទាមទារ​ឱ្យ​ដក​កម្លាំង​ទាំងអស់​ចេញពី​ក្រុម​ចម្រុះ​សកល ​ដឹកនាំ​ដោយ​សហរដ្ឋអាមេរិក​ប្រឆាំង​នឹង​ក្រុម​រដ្ឋ​អ៊ីស្លាម (IS) ទោះបីជា​មានការ​គំរាមកំហែង​ជា​បន្តបន្ទាប់ ដែល​បង្កឡើង​ដោយ​ក្រុម​ជី​ហាត​ស៊ុន​នី​ក៏ដោយ​៕

អត្ថបទ៖ សុខមាន