ក្រសួងការពារជាតិរបស់ចក្រភពអង់គ្លេស បាននិយាយនៅក្នុងព័ត៌មានចារកម្មកាលពីថ្ងៃព្រហស្បតិ៍ថា ប្រទេសរុស្ស៊ី បាននិងកំពុងបង្កើនការការពារសម្រាប់មូលដ្ឋានទ័ពជើងទឹកសមុទ្រខ្មី ( Black Sea Fleet) របស់ខ្លួន នៅក្នុងទីក្រុងណូវ៉ូរ៉ូស៊ី (Novorossiysk)។
ក្រសួង បានសរសេរនៅក្នុងសារបង្ហោះលើបណ្តាញសង្គម X ដោយដកស្រង់រូបភាពផ្កាយរណប ដែលខ្លួនទទួលបានថា៖« ហេដ្ឋារចនាសម្ព័ន្ធថែទាំ ការដឹកជញ្ជូន និងគ្រប់គ្រងអាវុធនៅទីក្រុងណូវ៉ូរ៉ូស៊ី ទំនងជាត្រូវបានធ្វើឲ្យប្រសើរឡើង»។
ក្រសួងការពារជាតិរបស់ចក្រភពអង់គ្លេស បានកត់សម្គាល់នៅក្នុងការធ្វើបច្ចុប្បន្នភាពរបស់ខ្លួនថា កងនាវាសមុទ្រខ្មៅ «បានដកនាវានិងនាវាមុជទឹកភាគច្រើនចេញពីទីក្រុង Sevastopol ឆ្ពោះទៅភាគខាងកើតឆ្ពោះទៅកាន់ទីក្រុងណូវ៉ូរ៉ូស៊ី»។
ក្រសួងបាននិយាយថា ដោយដាក់កងនាវានេះឲ្យឈរជើងនៅទីក្រុងណូវ៉ូរ៉ូស៊ី គឺជា«វិធីសាស្រ្តដ៏ល្អបំផុតរបស់កងនាវា ដើម្បីជៀសវាងការវាយប្រហារតាមសមុទ្ររបស់អ៊ុយក្រែន»។
កងកម្លាំងទ័ពជើងទឹករបស់រុស្ស៊ី បានទទួលរងការខាតបង់យ៉ាងធ្ងន់ធ្ងរ ចាប់តាំងពីសង្គ្រាមអ៊ុយក្រែន បានចាប់ផ្តើមក្នុងខែកុម្ភៈ ឆ្នាំ ២០២២។ ក្នុងខែកុម្ភៈ ប្រមុខកងកម្លាំងប្រដាប់អាវុធរបស់ចក្រភពអង់គ្លេស ឧត្តមនាវីឯក Sir Tony Radakin បានប៉ាន់ប្រមាណថា ២៥ភាគរយនៃនាវារុស្ស៊ីនៅក្នុងសមុទ្រខ្មៅ បានលិច ឬខូចខាត។