លោក Fu Cong តំណាងអចិន្ត្រៃយ៍របស់ចិនប្រចាំនៅអង្គការសហប្រជាជាតិ (UN) កាលពីថ្ងៃព្រហស្បតិ៍ (ទី១៨ ខែមេសា) បាននិយាយថា ប្រទេសចិនយល់ឃើញថា ការសម្រេចរបស់សហរដ្ឋអាមេរិក ក្នុងការវេតូ ចំពោះការស្នើសុំសមាជិកភាពពេញសិទ្ធិរបស់ប៉ាឡេស្ទីន គឺជារឿង «គួរឲ្យខកចិត្តបំផុត» ដោយការលើកឡើងនេះ មាននៅក្នុងការពន្យល់ពីការបោះឆ្នោតគាំទ្ររបស់ចិន ចំពោះសេចក្ដីសម្រេចព្រាងរបស់ក្រុមប្រឹក្សាសន្តិសុខអង្គការសហប្រជាជាតិ ស្តីពីការទទួលយកប៉ាឡេស្ទីនជារដ្ឋសមាជិកពេញសិទ្ធិរបស់ UN។
កាលពីព្រឹកថ្ងៃព្រហស្បតិ៍នោះ សហរដ្ឋអាមេរិកបានបោះឆ្នោតលើសំណើរបស់ប៉ាឡេស្ទីនទៅកាន់ក្រុមប្រឹក្សាសន្តិសុខអង្គការសហប្រជាជាតិ ដើម្បីទទួលបានសមាជិកភាពពេញសិទ្ធិរបស់ UN ដោយរារាំងស្ថាប័នពិភពលោកមួយនេះមិនឲ្យទទួលស្គាល់រដ្ឋប៉ាឡេស្ទីន។ សេចក្តីសម្រេចព្រាងនេះទទួលបានសំឡេងឆ្នោតគាំទ្រ ១២សំឡេង អនុបវាទ ២សំឡេង ដែលបោះដោយចក្រភពអង់គ្លេស និងស្វីស ហើយនិងមានសំឡេងប្រឆាំង ១សំឡេង។
ទាក់ទងនឹងការវេតូរបស់អាមេរិក លោក Fu បាននិយាយថា៖ «ថ្ងៃនេះគឺជាថ្ងៃដ៏សោកសៅ។ ដោយសារការវេតូរបស់សហរដ្ឋអាមេរិក ការដាក់ពាក្យស្នើសុំរបស់ប៉ាឡេស្ទីន ដើម្បីទទួលបានសមាជិកភាពពេញសិទ្ធិ នៅ UN ត្រូវបានច្រានចោល ហើយសុបិនជាច្រើនទសវត្សរ៍របស់ប្រជាជនប៉ាឡេស្ទីន បានរលាយបាត់យ៉ាងឃោរឃៅ។ ប្រទេសចិនមានការខកចិត្តយ៉ាងខ្លាំងជាមួយនឹងការសម្រេចរបស់សហរដ្ឋអាមេរិកនេះ»។
រដ្ឋឯករាជ្យប៉ាឡេស្ទីន គឺជាសុបិនដ៏យូរអង្វែងមកហើយរបស់ប្រជាជនប៉ាឡេស្ទីន។ ហើយលោក Fu បាននិយាយថា សមាជិកភាពពេញសិទ្ធិរបស់ដែនដីនេះ នៅ UN គឺជាជំហានដ៏សំខាន់មួយ នៅក្នុងទិសដៅប្រវត្តិសាស្ត្រនោះ។ លោក Fu បានបន្ថែមថា ការទទួលយកប៉ាឡេស្ទីនជាសមាជិកពេញសិទ្ធិរបស់ UN គឺមានភាពបន្ទាន់ជាងពេលណាៗទាំងអស់។ ជាមួយគ្នានេះ លោក Fu បានសង្កត់ធ្ងន់ថា ប្រទេសចិននឹងបន្តខិតខំប្រឹងប្រែងឥតឈប់ឈរ និងដើរតួនាទីស្ថាបនា ដើម្បីឲ្យមានការសម្រេចបានដំបូងនៃថ្ងៃនោះ។
សូមរំលឹកថា បេសកកម្មប៉ាឡេស្ទីនប្រចាំនៅ UN បានស្នើសុំឋានៈជាសមាជិកពេញសិទ្ធិរបស់ UN ក្នុងឆ្នាំ២០១១។ ការប៉ុនប៉ងលើកដំបូងរបស់ពួកគេបានបរាជ័យ ដោយសារមិនទទួលបានការគាំទ្រអប្បបរមាដែលត្រូវការចាំបាច់ចំនួន ៩សំឡេង ក្នុងចំណោមសមាជិក ១៥ប្រទេសរបស់ក្រុមប្រឹក្សាសន្តិសុខនេះ៕