ដោយអង្គុយជុំវិញភ្នក់ភ្លើងនៅលើភ្នំនៃតំបន់វេសបែង (West Bank) ដែលកាន់កាប់ដោយអ៊ីស្រាអែល លោក Ibrahim Abu Alyah និងមិត្តភក្តិមួយចំនួន បានឈរមើលហ្វូងសត្វរបស់គាត់ បន្ទាប់ពីការវាយប្រហាររបស់អ្នកតាំងលំនៅ ទៅលើភូមិរបស់ពួកគេ។

លោក Abu Alyah បានប្រាប់សារព័ត៌មាន AFPថា៖«យើងនៅទីនេះ ដូច្នេះយើងអាចដេញចៀមចេញ ហើយប្រាប់ប្រជាជនឲ្យការពារផ្ទះរបស់ពួកគេ ក្នុងករណីដែលមានអ្នកតាំងលំនៅ មករកនោះ»។

បន្ទាប់ពីអ្នកគង្វាលជនជាតិអ៊ីស្រាអែលអាយុ១៤ឆ្នាំ ឈ្មោះ Benjamin Achimeir បានបាត់ខ្លួនកាលពីថ្ងៃទី១២ ខែមេសា នៅកន្លែងតាំងទីលំនៅខុសច្បាប់ក្បែរនោះ អ្នកតាំងលំនៅជនជាតិជ្វីហ្វរាប់សិបនាក់ បានវាយឆ្មក់ទៅលើភូមិ Al-Mughayyir ភាគខាងជើងនៃទីក្រុងរ៉ាម៉ាឡា (Ramallah)។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ OCHA បានឲ្យដឹងថា ប្រដាប់ដោយកាំភ្លើងវែង និងដបដែលផ្ទុកសារធាតុបណ្តាលឲ្យផ្ទុះឆេះ ពួកគេបានដុតផ្ទះសំបែង សម្លាប់សត្វចៀម បង្កឲ្យមនុស្ស ២៣នាក់រងរបួស និង ៨៦នាក់ ត្រូវបានជម្លៀសចេញ។

ជនជាតិប៉ាឡេស្ទីនម្នាក់ ក៏ត្រូវបានសម្លាប់ ក្នុងអំពើហិង្សានោះដែរ។ លោគ Abu Alyah បានបាត់ចៀមចំនួន ២០ឬ ៣០ក្បាល និងប្រាក់ដែលគាត់បានមកពីការលក់ផលិតផលទឹកដោះគោ នៅពេលដែលផ្ទះរបស់គាត់ ត្រូវបានគេដុតឆេះគ្មានសល់នោះ។