អ្នកការទូតលោកខាងលិច នៅថ្ងៃសុក្រ (ទី១៩ ខែមេសា) នេះ បាននិយាយថា បណ្ដារដ្ឋលោកខាងលិចបានព្យាយាមបញ្ជូនសារទៅអ៊ីរ៉ង់ តាមរយៈប្រទេសទួរគី ក្នុងរយៈពេលប៉ុន្មានថ្ងៃថ្មីៗនេះ ដើម្បីអំពាវនាវជាថ្មីឲ្យបន្ធូរបន្ថយភាពតានតឹង។
សារនេះត្រូវបានបញ្ជូនទៅ មុនពេលមានសេចក្ដីរាយការណ៍ពីការវាយប្រហាររបស់អ៊ីស្រាអែលលើអ៊ីរ៉ង់ នៅព្រឹកថ្ងៃសុក្រនេះ ដែលបន្ទាប់ពីនោះទីក្រុងតេអេរ៉ង់បានបង្ហាញថា ខ្លួនមិនមានផែនការសងសឹកបន្ថែមទៀតនោះទេ។
គួរបញ្ជាក់ថា បន្ទាប់ពីមានការវាយប្រហារសងសឹករបស់អ៊ីរ៉ង់មកលើអ៊ីស្រាអែល កាលពីចុងសប្តាហ៍ ក្រសួងការបរទេសទួរគីបានបញ្ជាក់ពីការមានទំនាក់ទំនងជាមួយអ៊ីរ៉ង់ និងសហរដ្ឋអាមេរិក នៅក្នុងសេចក្តីថ្លែងការណ៍មួយ ដោយនិយាយថា ទីក្រុងអង់ការ៉ាបានអំពាវនាវឲ្យអត់ធ្មត់ និងព្រមានអំពីការមានសង្រ្គាមក្នុងតំបន់ ប្រសិនបើភាពតានតឹងបន្តកើនឡើងបន្ថែមទៀត។
នៅពេលសួរអំពីសារដែលទីក្រុងអង់ការ៉ាបញ្ជូនទៅកាន់ទីក្រុងតេអេរ៉ង់នោះ អ្នកការទូតលោកខាងលិចម្នាក់ បានប្រាប់ឲ្យដឹងថា៖ «ក្នុងរយៈពេលប៉ុន្មានថ្ងៃថ្មីៗនេះ យើងបាព្យាយាមផ្ញើសារទៅអ៊ីរ៉ង់ តាមរយៈប្រទេសទួរគី ជាពិសេសរំលឹកឡើងវិញនូវសារឲ្យមានការបន្ធូរបន្ថយនូវការកើនឡើងភាបតានតឹង»។
ក្រសួងការបរទេសទួរគី មិនអាចទាក់ទងបានភ្លាមៗនោះឡើយ ដើម្បីសុំការអត្ថាធិប្បាយពាក់ព័ន្ធនឹងការលើកឡើងនេះ៕