ជើងហោះហើរបានចាប់ផ្ដើមឡើងវិញ នៅថ្ងៃសុក្រ (ទី១៩ ខែមេសា) បន្ទាប់ពីក្រុមហ៊ុនអាកាសចរណ៍បានផ្លាស់ប្តូរផ្លូវហោះហើរពីលើប្រទេសអ៊ីរ៉ង់ លុបចោលជើងហោះហើរមួយចំនួន បង្វែរជើងហោះហើរផ្សេងទៀតទៅកាន់អាកាសយានដ្ឋានជំនួសផ្សេង ឬត្រលប់យន្តហោះមកវិញទៅកាន់ចំណុចចេញដំណើរ ដោយសារតែការបិទដែនអាកាស និងព្រលានយន្តហោះ ហើយនិងការព្រួយបារម្ភអំពីសុវត្ថិភាព បន្ទាប់ពីមានការវាយប្រហាររបស់អ៊ីស្រាអែលលើអ៊ីរ៉ង់។

បើយោងតាមគេហទំព័រតាមដានជើងហោះហើរ FlightRadar24 បានឲ្យដឹងថា អ៊ីរ៉ង់បានបិទអាកាសយានដ្ឋានរបស់ខ្លួន ក្នុងទីក្រុង Tehran (តេអេរ៉ង់) Shiraz (ស៊ីរ៉ាហ្ស៍) និង Isfahan (អ៊ីសហ្វាហាន) បន្ទាប់ពីមានការវាយប្រហារ និងបានបិទជើងហោះហើរពីផ្លូវហោះហើរលោកខាងលិចរបស់ខ្លួនរយៈពេលប៉ុន្មានម៉ោង បន្ទាប់ពីការវាយប្រហារបានកើតឡើង។

គេហទំព័រតាមដានជើងហោះហើរនេះ បានបង្ហាញថា ក្រុមហ៊ុន Emirates, Flydubai, Turkish Air, Wizz Air Abu Dhabi និង Belavia ស្ថិតក្នុងចំណោមក្រុមហ៊ុនអាកាសចរណ៍ដែលបន្តការហោះហើរលើផ្នែកនៃដែនអាកាសរបស់អ៊ីរ៉ង់ ដែលនៅតែបើកចំហក្នុងរយៈពេលប៉ុន្មានម៉ោងដំបូង បន្ទាប់ពីមានការវាយប្រហារ នាព្រឹកថ្ងៃសុក្រនេះ។

ក្រុមហ៊ុនអាកាសចរណ៍លោកខាងលិច និងអាស៊ីជាច្រើន បាន និងកំពុងបិទការហោះហើរពីលើប្រទេសអ៊ីរ៉ង់ និងដែនអាកាសរបស់ប្រទេសនេះរួចហើយ មុនពេលមានការវាយប្រហាររបស់អ៊ីស្រាអែល ដែលបានកើតឡើងប៉ុន្មានថ្ងៃ បន្ទាប់ពីមានការវាយប្រហារដោយមីស៊ីល និងយានដ្រូនរបស់អ៊ីរ៉ង់មកលើអ៊ីស្រាអែល៕