ស្ថានកុងស៊ុលអ៊ីរ៉ង់ នៅក្នុងទីក្រុងប៉ារីស នាថ្ងៃសុក្រ (១៩ មេសា) នេះ ត្រូវបាននគរបាលបារាំងបិទមិនឲ្យចេញចូល បន្ទាប់ពីមានរបាយការណ៍ថា មានបុរសម្នាក់គំរាមបំផ្ទុះខ្លួនឯងនៅទីនោះ។
ប្រភពពីនគរបាល បានប្រាប់សារព័ត៌មាន Reuters ថា នៅវេលាម៉ោងប្រហែល ១១ព្រឹក (ត្រូវនឹងម៉ោង ៩ ម៉ោងសកល) បុរសនោះត្រូវបានគេឃើញចូលទៅក្នុងស្ថានកុងស៊ុលដោយកាន់របស់ម្យ៉ាងដែលមើលទៅដូចជាគ្រាប់បែកដៃ និងអាវកាក់បំផ្ទុះ។ នគរបាលបាននិយាយថា ពួកគេបានទៅដល់កន្លែងកើតហេតុ ហើយបានសុំឲ្យសាធារណជនចៀសវាងកុំទៅកាន់តំបន់នោះ ប៉ុន្តែមិនបានផ្តល់ព័ត៌មានលម្អិតបន្ថែមនោះទេ។
ក្រុមហ៊ុនរថភ្លើងក្រោមដី RATP បានឲ្យដឹងថា សេវាកម្មត្រូវបានផ្អាកសម្រាប់ខ្សែរថភ្លើងក្រោមដីនៅក្បែរនោះ ដោយសារហេតុផលសុវត្ថិភាព។
បុគ្គលម្នាក់នៅស្ថានទូតអ៊ីរ៉ង់ដែលបានឆ្លើយតបនឹងការហៅទូរស័ព្ទពីសារព័ត៌មាន Reuters បានបដិសេធមិនផ្តល់ព័ត៌មានណាមួយអំពីស្ថានការណ៍នេះទេ។ គេមិនច្បាស់ទេថា តើហេតុការណ៍នេះមានទំនាក់ទំនងណាមួយទៅនឹងភាពតានតឹងកាន់តែខ្លាំងឡើង រវាងអ៊ីរ៉ង់ និងអ៊ីស្រាអែល៕