ទីភ្នាក់ងារសារព័ត៌មាន KCNA របស់ប្រទេសកូរ៉េខាងជើង បានរាយការណ៍និងបានចេញផ្សាយរូបភាពនៅថ្ងៃសៅរ៍នេះនៃការបាញ់សាកល្បងមីស៊ីលថា ប្រទេសកូរ៉េខាងជើង បានបាញ់សាកល្បងក្បាលគ្រាប់មីស៊ីលតម្រង់គោលដៅ និងបានបាញ់សាកល្បងមីស៊ីលប្រឆាំងយន្តហោះថ្មីរបស់ខ្លួននៅសមុទ្រខាងលិចរបស់ប្រទេសកូរ៉េ កាលពីថ្ងៃសុក្រ។
យោងតាមការរាយការណ៍ដោយលើកឡើងពីរដ្ឋបាលមីស៊ីលរបស់សាធារណរដ្ឋប្រជាមានិតប្រជាធិបតេយ្យកូរ៉េ បានឲ្យដឹងថា ប្រទេសកូរ៉េខាងជើង បានបាញ់សាកល្បងថាមពលនៃក្បាលគ្រាប់ធំទំនើប ដែលត្រូវបានរៀបចំសម្រាប់មីស៊ីលតម្រង់គោលដៅយុទ្ធសាស្ត្រ «Hwasal-1 Ra-3» និងបានបាញ់សាកល្បងមីស៊ីលប្រឆាំងយន្តហោះប្រភេទថ្មី«Pyoljji-1-2» កាលពីរសៀលថ្ងៃសុក្រ។
សារព័ត៌មាន KCNA បានរាយការណ៍ថា ការបាញ់សាកល្បងទាំងពីរនេះ ជាផ្នែកនៃសកម្មភាពជាទៀងទាត់របស់រដ្ឋបាលនិងវិទ្យាស្ថានវិទ្យាសាស្ត្រការពារ ដែលរួមបញ្ចូលគ្នា សម្រាប់ការអភិវឌ្ឍន៍ដ៏ឆាប់រហ័សនៃបច្ចេកវិទ្យាក្នុងទិដ្ឋភាពផ្សេងៗគ្នា ដូចជា ការបង្ហាញបច្ចេកទេស និងតាកទិក និងប្រតិបត្តិការនៃប្រព័ន្ធអាវុធ ហើយវាពុំមានជាប់ពាក់ព័ន្ធទៅនឹងស្ថានភាពតំបន់នោះទេ។
មីស៊ីលតម្រង់គោលដៅយុទ្ធសាស្ត្ររបស់ប្រទេសកូរ៉េខាងជើង ត្រូវបានគេជឿថា រៀបចំដើម្បីបំពាក់ក្បាលគ្រាប់នុយក្លេអ៊ែរ។
ប្រទេសកូរ៉េខាងត្បូង ជប៉ុន និងសហរដ្ឋអាមេរិក ជារឿយៗរាយការណ៍ពីការសាកល្បងមីស៊ីលទ្រង់ទ្រាយធំដែលពួកគេបានរកឃើញចេញពីកូរ៉េខាងជើងនោះ ពុំបាននិយាយអំពីការសាកល្បងការបាញ់បង្ហោះនេះទេ។