សៀមរាប៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានមានប្រសាសន៍ថា ការពង្រឹងនិងពង្រីកសមត្ថភាពនិងវិសាលភាពផ្នែកសុខាភិបាលមិនធ្វើតែមួយកន្លែងទេ យើងនឹងពង្រីកដោយរុញទៅកៀកនឹងប្រជាពលរដ្ឋ ហើយព្រមជាមួយនឹងសមិទ្ធផលខាងវិស័យសុខាភិបាលដែលសម្រេចបានជាបន្តបន្ទាប់នេះរាជរដ្ឋាភិបាលនឹងបង្កើតមន្ទីរពេទ្យតំបន់២ទៀតទី១នៅខេត្តសៀមរាបនិងទី២នៅខេត្តកំពង់ចាម។
ការថ្លែងរបស់សម្តេចធិបតីទាក់ទងនឹងវឌ្ឍនភាពនៃវិស័យសុខាភិបាលបែបនេះ ត្រូវបានធ្វើឡើងក្នុងពេលអញ្ជើញជាអធិបតីរួមគ្នា ជាមួយឯកអគ្គរាជទូតជប៉ុនប្រចាំនៅកម្ពុជាក្នុង
ពិធី សម្ពោធដាក់ឱ្យប្រើប្រាស់ «អគារមណ្ឌលផ្តល់សេវាផ្នែកវះកាត់» នៅក្នុងមន្ទីរពេទ្យបង្អែកខេត្តសៀមរាប ដែលមានតម្លៃជិត២០លានដុល្លារ ជាជំនួយរបស់ជប៉ុននាព្រឹកថ្ងៃទី២០ខែមេសានេះ។
សម្ដេចធិបតីបានគូសបញ្ជាក់ថា ចក្ខុវិស័យក្នុងការលើកកម្ពស់សេវាសុខាភិបាលគឺមិនអាចប្រមូលផ្តុំតែនៅរាជធានីភ្នំពេលបានទេ។
សម្ដេចធិបតីបញ្ជាក់ថា តាមផែនការពេទ្យតំបន់នៅទីនេះគឺយើងគ្រោងចាប់ផ្ដើមធ្វើនៅក្នុងឆ្នាំនេះហើយឆ្នាំ ២០៣០ នៅទីនេះនឹងអាចក្លាយទៅជាមជ្ឈមណ្ឌលព្យាបាលពេទ្យតំបន់ដែលអាចទទួលបានដោយមានអគារខ្ពស់ជាងដោយមានគ្រឿងបំពាក់ទំនើបៗជាងនេះទៅទៀត ហើយសម្ដេចក៏បានណែនាំឲ្យក្រសួងសុខាភិបាលត្រៀមក្នុងការបណ្ដុះបណ្ដាលគ្រូពេទ្យឲ្យហើយដែលអាចទទួលអ្នកជម្ងឺ មិនត្រឹមតែអ្នកខេត្តសៀមរាបទេ គឺអាចមកពីខេត្ត ព្រះវិហារ កំពង់ធំឬមកពីខេត្តស្ទឹងត្រែង និង ឧត្តរមានជ័យដែលអាចមានបរិមាណច្រើន៕