អាជ្ញាធរបាននិយាយថា ការបោះឆ្នោតនៅក្នុងប្រទេសឥណ្ឌា បានបិទកាលពីថ្ងៃសុក្រ ក្នុងដំណាក់កាលដំបូងនៃការបោះឆ្នោតធំបំផុតរបស់ពិភពលោក ខណៈនាយករដ្ឋមន្ត្រីលោក Narendra Modi ស្វែងរកអាណត្តិទី៣ជាប្រវត្តិសាស្ត្រ លើការគាំទ្របញ្ហាជាច្រើន ដូចជាកំណើនសេដ្ឋកិច្ច សុខមាលភាព និងជាតិនិយមសាសនាហិណ្ឌូ។
ការបោះឆ្នោតនេះ បានធ្វើឱ្យគណបក្ស ប៉ារ៉ាទីយ៉ា ចាណាតា(Bharatiya Janata Party) (BJP) របស់លោក Modi ប្រឆាំងនឹងសម្ព័ន្ធភាពនៃគណបក្សប្រឆាំងរាប់សិបគណបក្សដែលសន្យាថានឹងមានសកម្មភាពកាន់តែខ្លាំង និងការបែងចែកបន្ថែមទៀត ខណៈបញ្ជាក់លើអ្វីដែលពួកគេហៅថា តម្រូវការដើម្បីជួយសង្គ្រោះស្ថាប័នលទ្ធិប្រជាធិបតេយ្យ។
រយៈពេលបីម៉ោងមុនពេលការបោះឆ្នោតត្រូវបានបិទ តួលេខបានមកពីគណៈកម្មការរៀបចំការបោះឆ្នោត បានបង្ហាញពីចំនួនអ្នកទៅបោះឆ្នោតចន្លោះពី ៤០ភាគរយ នៅក្នុងរដ្ឋ Bihar ភាគខាងជើងដ៏ធំទូលាយ និង ៦៨ភាគរយ នៅរដ្ឋ Tripura ភាគឦសាន។
អ្នកនាំពាក្យគណៈកម្មាធិការរៀបចំការបោះឆ្នោត បានបង្ហោះនៅលើបណ្តាញ X ថា អ្នកបោះឆ្នោតបង្ហាញការសាទរជាខ្លាំង ខណៈការបោះឆ្នោតឈានដល់ពាក់កណ្តាលផ្លូវ។
ដំណាក់កាលដំបូងក្នុងចំណោមចំនួន៧ដំណាក់កាល ការបោះឆ្នោតកាលពីថ្ងៃសុក្រ មានអ្នកបោះឆ្នោតចំនួន១៦៦លាននាក់ នៅក្នុងមណ្ឌលបោះឆ្នោតចំនួន១០២មណ្ឌល នៅទូទាំងរដ្ឋ និងដែនដីចំនួន ២១ ចាប់ពីរដ្ឋ Tamil Nadu នៅភាគខាងត្បូងរហូតដល់រដ្ឋ Arunachal Pradesh នៅព្រំដែនតំបន់ហិម៉ាឡៃ ជាមួយប្រទេសចិន។
ប្រទេសដែលមានប្រជាជនច្រើនបំផុតលើពិភពលោកមួយនេះ កំពុងដំណើរការបោះឆ្នោតរហូតដល់ថ្ងៃទី ១ ខែមិថុនា ដោយលទ្ធផលកំណត់នៅថ្ងៃទី ៤ ខែមិថុនា។