ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅថ្ងៃទី១៩ ខែមេសា ឆ្នាំ២០២៤ បានដឹកនាំកិច្ចប្រជុំក្រុមការងារគ្រប់គ្រង និងអភិវឌ្ឍគោលដៅលម្ហែបៃតងក្នុងតំបន់ការពារធម្មជាតិ ដើម្បីជំរុញការវិនិយោគ គម្រោងអភិវឌ្ឍទេសចរណ៍ផ្សារភ្ជាប់នឹងធម្មជាតិខ្នាតតូច ប្រកបដោយប្រសិទ្ធភាព ឆ្លើយតបនឹងការអភិវឌ្ឍ ការអភិរក្សត្រូវដើរទន្ទឹមគ្នា ស្របតាមអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។
នៅក្នុងកិច្ចប្រជុំ ឯកឧត្តមបណ្ឌិត អ៊ាង សុផល្លែត បានមានប្រសាសន៍ថា ការបង្កើតនូវរបៀងទេសចរណ៍ធម្មជាតិផ្សារភ្ជាប់ពីតំបន់មួយទៅតំបន់មួយទៀត គឺជាការបន្ថែមនូវមុខរបរជូនប្រជាសហគមន៍ និងលើកស្ទួយជីវភាពសហគមន៍ ដោយមិនចាំបាច់ឱ្យប្រជាសហគមន៍ពឹងផ្អែកតែលើរបរចូលព្រៃដកហូតផល អនុផលព្រៃឈើតែមួយមុខនោះទេ។ ឯកឧត្តមបន្តថា គ្រប់គម្រោងអភិវឌ្ឍទេសចរណ៍ខ្នាតតូចទាំងអស់ ចាំបាច់ត្រូវតែមានការវាយតម្លៃជាមួយអ្នកជំនាញបច្ចេកទេស មេធាវីផ្នែកច្បាប់ត្រឹមត្រូវ ដើម្បីការពារផលប្រយោជន៍ជូនអ្នកវិនិយោគ និងប្រជាសហគមន៍ ហើយនឹងធានាឱ្យបាន នូវធនធានធម្មជាតិព្រៃឈើ ដែលជាមរតកបៃតង និងជាទ្រព្យសម្បត្តិរបស់ជាតិ៕
ជាការកត់សំគាល់ ការរៀបចំគោលដៅលំហែបៃតង សំដៅលើតំបន់សក្តានុពលទេសចរណ៍ធម្មជាតិ ដែលមាននៅក្នុងតំបន់ការពារធម្មជាតិ ដែលត្រូវបានសិក្សា ដោយរក្សាបាននូវគោលការណ៍ចំនួន៣ គឺ៖ ភាពស្អាត ភាពបៃតង និងចីរភាព ដើម្បីធានាបានការគ្រប់គ្រងធនធានធម្មជាតិ ការអភិរក្សជីវៈចម្រុះ និងការលើកកម្ពស់ជីវភាពសហគមន៍ប្រកបដោយនិរន្តភាព ការរក្សា និងបង្កើនគម្របព្រៃឈើជាអតិបរិមា និងអាចឈានទៅសម្រេចបាននូវសហគមន៍អព្យាក្រិត្យកាបូននៅឆ្នាំ២០៥០។ អត្ថបទ៖ទូច សោភ័ណ