មន្ត្រីលោកខាងលិចពីរនាក់ បានប្រាប់សារព័ត៌មាន AP កាលពីថ្ងៃសុក្រថា សហរដ្ឋអាមេរិក កំពុងព្យាយាមបង្កើតកិច្ចព្រមព្រៀងយោធាថ្មីមួយជាមួយប្រទេសនីហ្សេ ដែលនឹងអនុញ្ញាតឲ្យខ្លួនបន្តនៅក្នុងប្រទេសនេះ ប៉ុន្មានសប្តាហ៍បន្ទាប់ពីរបបយោធា បាននិយាយថា វត្តមានរបស់ខ្លួន មិនសមហេតុផលទៀតទេ។  

មន្ត្រីដែលបាននិយាយក្នុងលក្ខខណ្ឌមិនបញ្ចេញឈ្មោះ ដោយសារតែភាពរសើបនៃស្ថានការណ៍នោះ បាននិយាយថា ទីក្រុងវ៉ាស៊ីនតោន កំពុងធ្វើការយ៉ាងសកម្មលើជម្រើសសម្រាប់កិច្ចព្រមព្រៀង ដែលបានកែប្រែក្នុងគោលបំណងរក្សាជំហររបស់ខ្លួន នៅក្នុងប្រទេសអាហ្វ្រិកខាងលិចនេះ។

ប្រទេសនីហ្សេ ដើរតួនាទីកណ្តាលនៅក្នុងប្រតិបត្តិការរបស់យោធាអាមេរិក នៅក្នុងតំបន់សាហែល ( Sahel)នៃទ្វីបអាហ្រ្វិក ទីក្រុងវ៉ាស៊ីនតោន មានការព្រួយបារម្ភអំពីការរីករាលដាលនៃអំពើហិង្សារបស់ក្រុម ជីហាដ ដែលក្រុមក្នុងតំបន់ បានសន្យាភក្តីភាពចំពោះក្រុមអាល់កៃដា និងក្រុមរដ្ឋឥស្លាម(IS)។ នីហ្សេ  បានផ្តល់ទីតាំងសម្រាប់មូលដ្ឋានទ័ពអាកាសដ៏សំខាន់របស់សហរដ្ឋអាមេរិក នៅក្នុងទីក្រុង Agadez ចម្ងាយប្រហែល ៩២០ គីឡូម៉ែត្រ (៥៥០ម៉ាយ)ពីរដ្ឋធានីនីញ៉ាម៉េ( Niamey) ដោយប្រើប្រាស់វាសម្រាប់ជើងហោះហើរឃ្លាំមើលដោយមានមនុស្សបើក និងគ្មានមនុស្សបើក និងប្រតិបត្តិការផ្សេងទៀត។ សហរដ្ឋអាមេរិក ក៏បានវិនិយោគរាប់រយលានដុល្លារផងដែរ ក្នុងការបណ្តុះបណ្តាលយោធារបស់នីហ្សេ ចាប់តាំងពីខ្លួន បានចាប់ផ្តើមប្រតិបត្តិការ នៅទីនោះ ក្នុងឆ្នាំ ២០១៣។