ក្រុមអាជ្ញាធរប៉ាឡេស្ទីន អះអាងថា កងកម្លាំងអ៊ីស្រាអែល បានសម្លាប់ជនប៉ាឡេស្ទីន ១៤នាក់ អំឡុងការវាយឆ្មក់នៅតំបន់កាន់កាប់វ៉េសប៊ែងកាលពីថ្ងៃសៅរ៍ ស្របពេលដែលអ្នកបើកបររថយន្តគិលានសង្រ្គោះម្នាក់ ត្រូវបានសម្លាប់ ពេលគាត់ព្យាយាមទទួលអ្នករងរបួសពីការវាយប្រហារដាច់ដោយឡែកមួយផ្សេងទៀត ។ 

ការវាយឆ្មក់របស់អ៊ីស្រាអែលនៅក្នុងទីក្រុង Tulkarm ស្ថិតក្នុងតំបន់កាន់កាប់វ៉េសប៊ែងដែលបានចាប់ផ្តើមតាំងពីថ្ងៃព្រហស្បតិ៍ បានបន្តរហូតដល់ថ្ងៃសៅរ៍ ។ 

សំឡេងផ្ទុះអាវុធ នៅតែឮ ស្របពេលដែលយានដ្រូនយ៉ាងហោច ៣គ្រឿង ត្រូវបានគេមើលឃើញហោះសំកាំងពីលើតំបន់ Nur Shams ដែលជាតំបន់រស់នៅរបស់ជនភៀសខ្លួនពីសង្រ្គាមឆ្នាំ ១៩៤៨ ។ 

សូមបញ្ជាក់ថា តំបន់វ៉េសប៊ែង ស្ថិតក្នុងចំណោមដែនដីដែលអ៊ីស្រាអែលបានចូលកាន់កាប់នៅក្នុងសង្រ្គាមមជ្ឈិមបូព៌ាឆ្នាំ ១៩៦៧ និងជាកន្លែងដែលជនប៉ាឡេស្ទីន មានបំណងជាយូរមកហើយក្នុងការបង្កើតរដ្ឋឯករាជ្យរបស់ខ្លួន រួមទាំងការបញ្ចូលតំបន់ហ្កាហ្សា ហើយនិងទីក្រុងហ្សេរុយសាឡឹមខាងកើត ជារដ្ឋធានីរបស់ពួកគេ ៕