បុរសម្នាក់បានស្លាប់ បន្ទាប់ពីដុតខ្លួនឯងកាលពីថ្ងៃសុក្រ (១៩ មេសា) នៅខាងក្រៅតុលាការទីក្រុងញូវយ៉ក របស់សហរដ្ឋអាមេរិក ជាទីដែលការកាត់ក្តីជាប្រវត្តិសាស្រ្តរបស់លោក ដូណាល់ ត្រាំ (Donald Trump) កំពុងប្រព្រឹត្តទៅ ខណៈដែលការជ្រើសរើសគណៈវិនិច្ឆ័យបានបញ្ចប់ ប៉ុន្តែក្រុមមន្ត្រីបាននិយាយថា បុរសនោះហាក់ដូចជាមិនបានកំណត់គោលដៅលើលោក ត្រាំ នោះទេ។

បុរសរូបនោះបានដុតខ្លួនឯងអស់រយៈពេលជាច្រើននាទីដែលអាចកើលឃើញបានយ៉ាងច្បាស់ពីកាមេរ៉ាទូរទស្សន៍ដែលត្រូវបានតំឡើងនៅខាងក្រៅតុលាការ ជាទីដែលការកាត់ក្តីឧក្រិដ្ឋកម្មលើកដំបូងមិនធ្លាប់មានរបស់អតីតប្រធានាធិបតីសហរដ្ឋអាមេរិកកំពុងត្រូវបានធ្វើឡើង។ អ្នកនាំពាក្យនាយកដ្ឋាននគរបាលក្រុងញូវយ៉ក (NYPD) បាននិយាយថា បុរសនោះត្រូវគេប្រកាសថាបានស្លាប់នៅមន្ទីរពេទ្យ ដោយសាររបួសធ្ងន់ធ្ងរ។

សាក្សីនិយាយថា បុរសនោះមានវ័យប្រហែល ៣០ឆ្នាំ បានទាញខិត្តប័ណ្ណមួយចំនួនពីកាបូបស្ពាយហើយបោះក្រដាសទាំងនោះឡើងលើ រួចយកសារធាតុរាវចាក់លើខ្លួនហើយក៏ដុតខ្លួនឯង។ ខិត្តប័ណ្ណមួយក្នុងចំនោមខិត្តប័ណ្ណទាំងនោះរួមមានឯកសារដែលនិយាយពី «មហាសេដ្ឋីអាក្រក់» ប៉ុន្តែផ្នែកដែលអាចមើលឃើញដោយសាក្សីមិនបាននិយាយអំពីឈ្មោះលោក ត្រាំ ទេ។

នាយកដ្ឋាននគរបាលក្រុងញូវយ៉ក និយាយថា បុរសដែលពួកគេបានកំណត់ថាឈ្មោះ មេក អាហ៊្សារេឡូ (Max Azzarello) មកពីក្រុង សេន អូហ្គឺសស្ទីន (St. Augustine) រដ្ឋ ហ្វ្លរីដា (Florida) នោះហាក់ដូចជាមិនបានកំណត់គោលដៅលើលោក ត្រាំ ឬអ្នកផ្សេងទៀតដែលពាក់ព័ន្ធនឹងការកាត់ក្តីនោះទេ។ 

លោក ត្រាំ ត្រូវបានចោទប្រកាន់ពីបទបិទបាំងការបង់ប្រាក់ចំនួន ១៣០.០០០ ដុល្លារ ដែលមេធាវីរបស់លោកកាលពីពេលនោះឈ្មោះ ម៉ៃខល ខូហេន (Michael Cohen) បានឱ្យតារាថតរឿងផ្លូវភេទម្នាក់ឈ្មោះ ស្តមមី ដានីញ៉ែលស៍ (Stormy Daniels) មុនពេលការបោះឆ្នោតឆ្នាំ ២០១៦ ដើម្បីបំបិទម៉ាត់អំពីទំនាក់ទំនងផ្លូវភេទដែលនាងនិយាយថាធ្លាប់មានជាមួយលោក ត្រាំ កាលពីមួយទសវត្សរ៍មុន៕