គិតចាប់ពីថ្ងៃទី២២ ដល់៣០ ខែមេសា ឆ្នាំ២០២៤ មជ្ឈមណ្ឌល​ការងារ​ចល័ត​របស់​ទីភ្នាក់ងារ​ជាតិ​មុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ នឹងចុះផ្សព្វ​ផ្សាយ​ឱកាស​ការងារនៅតាមសាកលវិទ្យាល័យ និងគ្រឹះស្ថានសិក្សានានា នៅរាជធានីភ្នំពេញ ដើម្បីផ្តល់​ព័ត៌មាន​អំពី​ទីផ្សារការងារ ក៏ដូចជាការនាំយកឱកាសការងារឲ្យកាន់តែខិតជិតដល់យុវជន និង​អ្នក​ស្វែង​រកការងារ ដើម្បីបង្កើនលទ្ធភាពនៃការទទួលបានការងារកាន់តែឆាប់រហ័ស។

លោក ជិន ខិ អនុប្រធានមជ្ឈមណ្ឌលការងាររាជធានីភ្នំពេញរបស់ទីភ្នាក់ងារជាតិមុខរបរ និង​ការងារបានឲ្យព័ត៌មាន ប៊ីធីវី ដឹងថា ការចុះផ្សព្វផ្សាយពីឱកាសការងារ និងផ្តល់សេវា​ការងារ​នៅ​តាម​សាកលវិទ្យាល័យ និងគ្រឹះស្ថានសិក្សានានា សម្រាប់ថ្ងៃនេះ រួមមាន៖ វិទ្យាស្ថាន​ជាតិ​ពហុ​បច្ចេក​ទេស​កម្ពុជា (NPIC) , សាកលវិទ្យាល័យឯកទេសនៃកម្ពុជា (CUS) , វិទ្យាស្ថានបច្ចេក​វិទ្យា​កម្ពុជា (ITC/តិចណូ) និងសាកលវិទ្យាល័យពាណិជ្ជសាស្ត្រ អេស៊ីលីដា (AUB)។

លោកបានបញ្ជាក់ថា ក្រៅពីការងារផ្សព្វផ្សាយខាងលើនេះ ទីភ្នាក់ងារជាតិមុខរបរ និងការងារ នឹង​បន្ត​រៀបចំវេទិកាការងារ ពិព័រណ៍ការងារ និងកិច្ចសម្ភាសការងារជាប្រចាំ ដើម្បីបង្កើត​ជា​កន្លែង​ជួប​ជុំគ្នា​ដោយ​ងាយ​ស្រួល​រវាងអ្នកស្វែងរកការងារធ្វើ និងនិយោជកដែលកំពុងត្រូវ​ការ​ជ្រើស​រើស​បុគ្គលិក​ អាចពិភាក្សា និងស្វែងយល់អំពីតម្រូវការជំនាញនៅក្នុងទីផ្សារការងារ។

យោងតាមកាលវិភាគរបស់ទីភ្នាក់ងារជាតិមុខរបរ និងការងារ ការផ្សព្វ​ផ្សាយ​ឱកាស​ការងារ​នៅ​តាម​សាកលវិទ្យាល័យ និងគ្រឹះស្ថានសិក្សានានា សម្រាប់ថ្ងៃទី២៣ ខែមេសាស្អែកនេះ រួមមាន៖ នៅ​សាកលវិទ្យាល័យជាតិគ្រប់គ្រង, សាកលវិទ្យាល័យមេគង្គកម្ពុជា, សាកលវិទ្យាល័យវេស្ទើន, សាកល​វិទ្យាល័យពុទ្ធិសាស្ត្រ និងសាកលវិទ្យាល័យសេដ្ឋកិច្ច និងហិរញ្ញវត្ថុ។ ថ្ងៃទី ២៤ មេសា នៅ​សាកលវិទ្យាល័យភូមិន្ទភ្នំពេញ, សាកលវិទ្យាល័យអាស៊ី អឺរ៉ុប, វិទ្យាស្ថានជាតិសង្គមកិច្ច, សាកល​វិទ្យាល័យ​ធន​ធានមនុស្ស និងសាកលវិទ្យាល័យកម្ពុជា។ ថ្ងៃទី២៥ មេសា នៅសាកលវិទ្យាល័យ​ភូមិន្ទ​នីតិ​សាស្ត្រ និង​វិទ្យាសាស្ត្រសេដ្ឋកិច្ច, សាកលវិទ្យាល័យភូមិន្ទវិចិត្រសិល្បៈ និងសាកល​វិទ្យាល័យ​អន្តរជាតិ។ ថ្ងៃទី២៦ មេសា នៅសាកលវិទ្យាល័យភូមិន្ទកសិកម្ម, សាកលវិទ្យាល័យ​វិទ្យា​សាស្ត្រ​សុខាភិបាល, សាកលវិទ្យាល័យបៀលប្រាយ និងមូលដ្ឋានខណ្ឌមានជ័យ។ ថ្ងៃទី២៩ មេសា នៅវិទ្យាស្ថានជាតិពាណិជ្ជសាស្ត្រ, សាកលវិទ្យាល័យឯកទេសនៃកម្ពុជា, វិទ្យាស្ថាន​បច្ចេក​វិទ្យា​កម្ពុជា​ និងសាកលវិទ្យាល័យពាណិជ្ជសាស្ត្រអេស៊ីលីដា និងថ្ងៃទី ៣០ មេសា នៅសាកល​វិទ្យាល័យ​ភូមិ​ន្ទភ្នំពេញ, សាកលវិទ្យាល័យ អាស៊ី អឺរ៉ុប, វិទ្យាស្ថានជាតិសង្គមកិច្ច, សាកល​វិទ្យា​ល័យ​ធន​ធានមនុស្ស និងសាកលវិទ្យាល័យកម្ពុជា៕ អត្ថបទ៖ ឈិត បូរ៉ាវី