រដ្ឋមន្ត្រីការបរទេស និងការពារជាតិនៃរដ្ឋសមាជិកសហភាពអឺរ៉ុប (EU) បានជួបប្រជុំគ្នា នៅប្រទេសលុចសំបួ នៅថ្ងៃចន្ទ (២២ មេសា) នេះ ដោយការពង្រឹងការការពារដែនអាកាសរបស់អ៊ុយក្រែន និងពង្រីកទណ្ឌកម្មបន្ថែមលើអ៊ីរ៉ង់ ស្ថិតក្នុងរបៀបវារៈ។

ដោយសាររុស្ស៊ីបានបង្កើនការវាយប្រហារតាមអាកាសលើហេដ្ឋារចនាសម្ព័ន្ធថាមពលរបស់អ៊ុយក្រែន និងគោលដៅផ្សេងទៀត រដ្ឋាភិបាល EU កំពុងស្ថិតនៅក្រោមសម្ពាធក្នុងការផ្គត់ផ្គង់ប្រព័ន្ធការពារដែនអាកាសបន្ថែមទៀតទៅឲ្យទីក្រុងគីវ ដូចជាប្រព័ន្ធ Patriot ជាដើម។

ទីក្រុងគីវ និងសម្ព័ន្ធមិត្តអឺរ៉ុបរបស់ខ្លួន ទទួលបានការជំរុញយ៉ាងខ្លាំងក្លាមួយ កាលពីចុងសប្តាហ៍ នៅពេលដែលសភាតំណាងរាស្ត្រអាមេរិក បានអនុម័តកញ្ចប់ថវិកាតម្លៃជាង ៦០ពាន់លានដុល្លារ ដើម្បីជួយដោះស្រាយសង្រ្គាម នៅអ៊ុយក្រែន។

រដ្ឋមន្ត្រីការបរទេសលីទុយអានី លោក Gabrielius Landsbergis បាននិយាយថា ជាមួយនឹងការអនុម័តកញ្ចប់ជំនួយនោះ ពួកគេបាន «គេចផុតពីការមានរបួសជាប្រវត្តិសាស្ត្រ» ប៉ុន្តែបានបន្ថែមថា បណ្តាប្រទេស EU និងអង្គការណាតូ (NATO) មិនគួរបន្ថយការផ្តល់ជំនួយដល់អ៊ុយក្រែននោះឡើយ៕