បាល់ទាត់៖ ​ក្លិប​បិសាច​ក្រហម Manchester United និង Real Madrid បាន​ឈានដល់​កិច្ចព្រមព្រៀង​នឹង​គ្នា​ហើយ​ក្នុងការ​ផ្ទេរ​ខ្សែការពារ​បារាំង Raphael Varane ទៅកាន់​ទឹកដី Old Trafford ក្នុងតម្លៃ​ប្រមាណ ៣៤លាន​ផោន​។ ​​កិច្ចព្រមព្រៀង​នេះ​ក៏ត្រូវ​បាន​គេ​ដឹងថា​ នឹង​ឡើងដល់ ៤២លាន​ផោន​បូក​នឹង​ប្រាក់​បន្ថែម​ផ្សេងៗ​។

​​Raphael Varane នឹង​ក្លាយជា​កីឡាករ​ទី​ពីរ​ដែល​ផ្ទេរ​មកកាន់ Old Trafford មិន​រដូវ​កាល​ថ្មី​ខាងមុខនេះ​បន្ទាប់ពី Jadon Sancho ផ្ទេរ​ពី Borussia Dortmund ផ្លូវការ​ក្នុងតម្លៃ ៧៣លាន​ផោន​។ កីឡាករ​វ័យ ២៧ឆ្នាំ​រូបនេះ​បាន​នៅ​ជាមួយ Los Blancos ចាប់តាំងពី​ឆ្នាំ២០១១ និង​បាន​បង្ហាញខ្លួន​ចំនួន ៣៥១លើក​សម្រាប់​ក្លិប​គ្រប់​ក្របខណ្ឌ​។ ​Raphael Varane នឹង​ដល់​ឆ្នាំ​ចុងក្រោយ​នៃ​កិច្ចសន្យា​របស់ខ្លួន​នៅ​ខែមិថុនា​ឆ្នាំក្រោយ​ ហើយ​មិនមាន​ការចង្អុលបង្ហាញ​ណាមួយ​ដែលថា​ គេ​សុខចិត្ត​បន្ត​ការ​ស្នាក់នៅ​ជាមួយ​ក្លឹប​នោះទេ​។​

​​ដូច្នេះ Real Madrid ចង់ ​រឹ​មិន​ចង់​នឹង​អាច​លក់​ខ្សែការពារ​សញ្ជាតិ​បារាំង​នេះ​ ចេញ​នៅ​រដូវក្តៅ​ខាងមុខ ប្រសើរ​ជាងការចាកចេញ​ដោយ​មិន​ទទួលបាន​អ្វី​សោះ​។ ​ក្រុម​បិសាច​ក្រហម Manchester United មាន​ចំណាប់អារម្មណ៍​លើ​ខ្សែការពារ​កណ្តាល​រូបនេះ តាំងពី​ពេលដែល Varane នៅ Lens ជិត​មួយ​ទសវត្សរ៍​មុន​ហើយ​ក្លិប​នៅ Old Trafford មួយ​នេះ​ក៏​ព្យាយាម​ម្តងទៀត​នៅ​ឆ្នាំ២០១៩ ចែចូវ​កីឡាករ​វ័យ ២៧ឆ្នាំ​រូបនេះ​ពី Real Madrid៕

​អត្ថបទ​៖​នាង សុភា​វុ​ធ