នាយករដ្ឋមន្ត្រីអង់គ្លេស លោក រីស៊ី ស៊ុណាក់ កំពុងធ្វើដំណើរទៅកាន់ប្រទេសប៉ូឡូញ នៅថ្ងៃអង្គារនេះ ដើម្បីជួបជាមួយនាយករដ្ឋមន្រ្តីប៉ូឡូញ លោក ដូណាល់ ថាស់ ( Donald Tusk) និងអគ្គលេខាធិការនៃ  សម្ព័ន្ធការពារជាតិណាតូ ហើយសន្យាថា នឹងផ្តល់ប្រាក់បន្ថែមទៀត ដើម្បីគាំទ្រប្រទេសអ៊ុយក្រែន។

ចក្រភពអង់គ្លេស នឹងផ្តល់ប្រាក់បន្ថែមចំនួន ៥០០លានផោនដល់ទីក្រុងគីវ ជាចំនួននៃទឹកប្រាក់សរុប ២,៥ពាន់លានផោន ដែលបានបម្រុងទុកសម្រាប់ឆ្នាំហិរញ្ញវត្ថុនេះ។

លោក រីស៊ី ស៊ុណាក់ ចង់សង្កត់ធ្ងន់លើតួនាទីរបស់ចក្រភពអង់គ្លេស ក្នុងការការពារអ៊ុយក្រែន។

បន្ទាប់មក លោក ស៊ុណាក់ នឹងធ្វើដំណើរទៅកាន់ទីក្រុងប៊ែរឡាំង ដើម្បីជួបជាមួយអធិការបតីអាល្លឺម៉ង់ លោក អូឡាហ្វ សូល នៅថ្ងៃពុធ។

សភាអង់គ្លេសនិយាយថា អឺរ៉ុបប្រឈមមុខនឹង«រុស្ស៊ីដែលជាអ្នកវាតទីនិយម» ហើយអ៊ុយក្រែនប្រឈមមុខនឹង «រដូវក្តៅដ៏លំបាក»។  

«ការការពារអ៊ុយក្រែនប្រឆាំងនឹងមហិច្ឆតាដ៏ឃោរឃៅរបស់រុស្ស៊ី គឺមានសារៈសំខាន់សម្រាប់សន្តិសុខរបស់យើង និងសម្រាប់អឺរ៉ុបទាំងមូល»។

លោកស៊ុកណាក់ បានថ្លែងថា៖«ប្រសិនបើលោក ពូទីន ត្រូវបានអនុញ្ញាតឲ្យទទួលបានជោគជ័យ ក្នុងសង្គ្រាមឈ្លានពាននេះ លោកនឹងមិនឈប់ នៅត្រឹមព្រំដែនប៉ូឡូញទេ»។

អ៊ុយក្រែន និងប៉ូឡូញ មានព្រំដែនជាប់គ្នាប្រវែង ៣០០ម៉ាយ។

ប្រទេសប៉ូឡូញ ក៏មានព្រំប្រទល់គោក ១៣០ម៉ាយជាមួយរុស្ស៊ីខ្លួនឯងផងដែរ ដោយទីក្រុង Kaliningrad ជាផ្នែកនៃប្រទេសរុស្ស៊ី ដែលជាដែនដីរបស់ខ្លួន នៅសមុទ្របាល់ទិក។

ការផ្តោតអារម្មណ៍របស់លោក ស៊ុណាក់ គឺជាការគាំទ្របន្ថែមសម្រាប់អ៊ុយក្រែន ដូច្នេះហើយលោកនឹងជជែកតវ៉ាសម្រាប់អឺរ៉ុបទាំងមូលអំពីគ្រាប់រំសេវបន្ថែមទៀត ការការពារអាកាស យានដ្រូន និងជំនួយផ្នែកវិស្វកម្ម។

មីស៊ីលជាង ១.៦០០គ្រាប់ កំពុងត្រូវបានផ្តល់ជូន រថពាសដែក ១៦២គ្រឿង និងយានយន្តសម្រាប់ផ្លូវគោកចំនួន ៧៨គ្រឿង។