ចៅក្រមតុលាការកំពូលរបស់សហរដ្ឋអាមេរិក បានដោះស្រាយវិបត្តិមនុស្សគ្មានផ្ទះសម្បែងរបស់ប្រទេស កាលពីថ្ងៃចន្ទ (ទី២២ មេសា) ខណៈដែលពួកគេបានតស៊ូជាមួយនឹងភាពស្របច្បាប់នៃច្បាប់ក្នុងស្រុកដែលប្រើប្រឆាំងនឹងអ្នកបោះជំរុំនៅតាមដងផ្លូវសាធារណៈ និងសួនច្បារ នៅក្នុងករណីដែលពាក់ព័ន្ធនឹងគោលនយោបាយប្រឆាំងភាពអនាថារបស់ទីក្រុង Oregon ភាគនិរតី។

ចៅក្រមបានស្ដាប់ទឡ្ហីករណ៍នៅក្នុងបណ្តឹងឧទ្ធរណ៍របស់ទីក្រុង Grants Pass ដែលលើកឡើងថា សេចក្តីសម្រេចរបស់តុលាការជាន់ទាបដែលអនុវត្តច្បាប់ប្រឆាំងនឹងការបោះជំរំលើជនគ្មានផ្ទះសម្បែង នៅពេលដែលគ្មានកន្លែងផ្ដល់ទីជម្រក គឺបំពានលើការហាមឃាត់វិសោធនកម្មទី៨ របស់រដ្ឋធម្មនុញ្ញសហរដ្ឋអាមេរិកស្តីពីការដាក់ទណ្ឌកម្មដ៏ឃោរឃៅ និងខុសពីធម្មតា។

ចៅក្រមអភិរក្សមួយចំនួនទំនងជាសាកសួរ ចំពោះសេចក្តីសម្រេចរបស់តុលាការជាន់ទាប ឬលើកឡើងថា ជនគ្មានផ្ទះសម្បែង ត្រូវមានជម្រើសផ្លូវច្បាប់ផ្សេង។ ចៅក្រមខាងសេរីទំនងជាត្រៀមខ្លួនជាស្រេចឈរជាមួយនឹងដើមបណ្តឹងជនគ្មានផ្ទះសម្បែង ដែលជំទាស់នឹងច្បាប់របស់ទីក្រុងនេះ។ សំឡេងភាគច្រើនក្នុងតុលាការ គឺខាងអភិរក្សនិយម ដោយមានសំឡេង ៦ទល់នឹង៣។

គួរបញ្ជាក់ថា អ្នកតស៊ូមតិសម្រាប់ជនគ្មានផ្ទះសម្បែង ក្រុមអ្នកច្បាប់សេរីនិយម និងអ្នករិះគន់ផ្សេងទៀត បានលើកឡើងថា ច្បាប់បែបនេះត្រូវបានប្រើដាក់ទោសជនអនាថា និងសម្រាប់សកម្មភាពផ្សេងៗ ដោយសារមិនអាចចៀសបានតែប៉ុណ្ណោះ ដូចជាការដេកនៅទីសាធារណៈជាដើម។ ពួកគេចង្អុលបង្ហាញពីសេចក្តីសម្រេចរបស់តុលាការកំពូលឆ្នាំ១៩៦២ ដែលវិសោធនកម្មទី៨ បានហាមឃាត់ការដាក់ទណ្ឌកម្មបុគ្គល ដោយផ្អែកលើស្ថានភាពរបស់ពួកគេ៕