រុស្ស៊ីបាននិយាយកាលពីថ្ងៃចន្ទថា ការគាំទ្រផ្នែកយោធារបស់សហរដ្ឋអាមេរិក អង់គ្លេស និងបារាំងសម្រាប់អ៊ុយក្រែន បានជំរុញពិភពលោកឲ្យឈានទៅដល់ស្ថានភាពនៃការប៉ះទង្គិចគ្នាដោយផ្ទាល់រវាងមហាអំណាចនុយក្លេអ៊ែរដ៏ធំបំផុតរបស់ពិភពលោក ដែលអាចបញ្ចប់ដោយមហន្តរាយ។
អ្នកការទូតរុស្ស៊ី និងសហរដ្ឋអាមេរិក បាននិយាយថា ការឈ្លានពានឆ្នាំ ២០២២របស់លោកប្រធានាធិបតី វ្ល៉ាឌីមៀ ពូទីន ទៅលើអ៊ុយក្រែន បានឈានដល់ការបែកបាក់ដ៏អាក្រក់បំផុត នៅក្នុងទំនាក់ទំនងរវាងរុស្ស៊ី និងលោកខាងលិច ចាប់តាំងពីវិបត្តិមីស៊ីលគុយបាឆ្នាំ ១៩៦២មក។
រយៈពេលត្រឹមតែពីរថ្ងៃបន្ទាប់ពីសមាជិកសភាអាមេរិក បានអនុម័តជំនួយយោធាបន្ថែមរាប់ពាន់លានដុល្លារដល់អ៊ុយក្រែន រដ្ឋមន្ត្រីការបរទេសលោក សឺហ្គេ ឡាវរ៉ូវ (Sergei Lavrov) បានថ្លែងថា សហរដ្ឋអាមេរិក និងអង្គការណាតូ បានឈ្លក់វង្វេងនឹងគំនិតនៃ «ការបរាជ័យជាយុទ្ធសាស្ត្រ»លើប្រទេសរុស្ស៊ី។
លោកឡាវរ៉ូវ បានបញ្ជាក់ថា ការគាំទ្ររបស់លោកខាងលិចសម្រាប់អ៊ុយក្រែន កំពុងធ្វើឲ្យសហរដ្ឋអាមេរិក និងសម្ព័ន្ធមិត្តរបស់ខ្លួន ឈានទៅដល់ការប៉ះទង្គិចផ្នែកយោធាដោយផ្ទាល់ជាមួយរុស្ស៊ី។
លោកឡាវរ៉ូវ បានថ្លែងប្រាប់សន្និសីទនៅទីក្រុងមូស្គូស្តីពីការមិនរីកសាយភាយអាវុធនុយក្លេអ៊ែរថា៖«ជនជាតិលោកខាងលិច កំពុងប្រឈមនឹងលទ្ធភាពនៃការប៉ះទង្គិចគ្នាផ្នែកយោធាដោយផ្ទាល់រវាងមហាអំណាចនុយក្លេអ៊ែរ ដែលពោរពេញដោយផលវិបាកដ៏មហន្តរាយ»។