ក្រុមអ្នកជំនាញ មកពីទីភ្នាក់ងារថាមពលអាតូមិកអន្តរជាតិ(IAEA) ធ្វើទស្សនកិច្ចនៅកាន់ប្រទេសជប៉ុនដើម្បីពិនិត្យការបញ្ចេញទឹកដែលបានធ្វើប្រព្រឹត្តិកម្មនិងពង្រាវរួច ចេញពីរោងចក្រថាមពលនុយក្លេអ៊ែរ Fukushima Daiichi ដែលមិនដំណើរការចូលទៅក្នុងមហាសមុទ្រ។ ក្រុមការងាររបស់ IAEA នឹងពិនិត្យមើលសុវត្ថិភាពជាលើកទីពីរចាប់តាំងពីប្រតិបត្តិការបញ្ចេញទឹកដែលបានចាប់ផ្តើមកាលពីខែសីហា ឆ្នាំមុន។
អ្នកជំនាញមកពីប្រទេសនានា រួមមានសហរដ្ឋអាមេរិក កូរ៉េខាងត្បូង និងប្រទេសចិន បានធ្វើទស្សនកិច្ចនៅក្រសួងការបរទេសក្នុងទីក្រុងតូក្យូ នៅថ្ងៃអង្គារនេះ។
ក្រុមអ្នកជំនាញ បានជួបជាមួយមន្ត្រីមកពីក្រសួងឧស្សាហកម្ម និងក្រុមហ៊ុនថាមពលអគ្គិសនីទីក្រុងតូក្យូ ដែលគ្រប់គ្រងរោងចក្រ Fukushima។ អ្នកសម្របសម្រួលរបស់ទីភ្នាក់ងារ IAEA លោក Gustavo Caruso បាននិយាយថា ក្រុមអ្នកជំនាញនឹងធ្វើទស្សនកិច្ចនៅរោងចក្រ Fukushima Daiichi ដើម្បីតាមដានលើប្រធានបទបច្ចេកទេស ដែលមានសារៈសំខាន់សម្រាប់សុវត្ថិភាព។
លោកនិយាយថា វិធីសាស្រ្តផ្អែកលើវិទ្យាសាស្រ្ត គោលដៅនិងឯករាជ្យ នឹងជួយកសាងទំនុកចិត្ត នៅក្នុងប្រទេសជប៉ុន និងលើសពីនេះ។
សមាជិកក្រុមការងារ នឹងស្នាក់នៅក្នុងប្រទេសជប៉ុនរហូតដល់ថ្ងៃសុក្រ។ ពួកគេមានផែនការពិនិត្យមើលដំណើរការបញ្ចេញទឹក និងជួបមន្ត្រីអាជ្ញាធរនិយ័តកម្មនុយក្លេអ៊ែរ និងស្ថាប័នផ្សេងៗទៀត។
ទឹកដែលបានប្រមូល កំពុងត្រូវបានធ្វើប្រព្រឹត្តិកម្មដើម្បីយកចេញសារធាតុវិទ្យុសកម្មភាគច្រើន ប៉ុន្តែនៅតែមានសារធាតុទ្រីចូម។ មុននឹងបញ្ចេញទឹកដែលបានធ្វើប្រព្រឹត្តិកម្មរួចចូលទៅក្នុងមហាសមុទ្រ ប្រតិបត្តិកររោងចក្រ បានពង្រាវដើម្បីកាត់បន្ថយកម្រិតសារធាតុទ្រីចូម ដល់ប្រហែលមួយភាគប្រាំពីរនៃកម្រិតណែនាំរបស់អង្គការសុខភាពពិភពលោកសម្រាប់ទឹកទទួលទាន។