មន្ត្រីយោធាអ៊ុយក្រែន បាននិយាយនៅព្រឹកថ្ងៃអង្គារនេះថា ប្រទេសរុស្ស៊ី បានបើកការវាយប្រហារដោយយានដ្រូនលើអ៊ុយក្រែន ដែលបានបង្កឲ្យមនុស្ស ៩នាក់រងរបួស នៅក្នុងកំពង់ផែសមុទ្រខ្មៅនៃទីក្រុង Odesa ដែលក្នុងនោះ ៤នាក់ជាកុមារ ហើយក៏បានកំណត់គោលដៅលើទីក្រុងគីវផងដែរ។
អភិបាលនៃតំបន់ Odesa លោក Oleh Kiper បាននិយាយនៅលើកម្មវិធីផ្ញើសារ Telegram ថា ក្មេងៗដែលរងរបួសរួមមានទារកពីរនាក់ និងមនុស្សពេញវ័យបីនាក់ដែលរងរបួស ត្រូវបានសម្រាកព្យាបាលនៅមន្ទីរពេទ្យ។
លោកបានបន្តថា អគារលំនៅឋានជាច្រើនក្នុងទីក្រុងនេះ បានរងការខូចខាត និងត្រូវភ្លើងឆាបឆេះ។ រដ្ឋបាលក្រុងនេះ បានបន្ថែមថា យ៉ាងហោចណាស់ផ្ទះល្វែងចំនួន១៤ ត្រូវបានខូចខាត។
កងទ័ពអាកាសអ៊ុយក្រែន បាននិយាយថា រុស្ស៊ីបានវាយប្រហារដោយយានដ្រូនសរុបចំនួន ១៦គ្រឿង សំដៅលើអ៊ុយក្រែន និងមីស៊ីលបាលិស្ទិករយៈចម្ងាយខ្លី Iskander ចំនួនពីរគ្រាប់។
កងទ័ពអាកាស បាននិយាយនៅលើបណ្តាញសង្គម Telegram ថា ប្រព័ន្ធការពារអាកាស បានបំផ្លាញយានដ្រូនចំនួន ១៥គ្រឿង នៅលើតំបន់Odesa និង Mykolaiv ភាគខាងត្បូងអ៊ុយក្រែន តំបន់Cherkasyភាគ កណ្តាល និង តំបន់រដ្ឋធានីគីវ។ កងទ័ពនេះ មិនបាននិយាយថា មានអ្វីកើតឡើងចំពោះមីស៊ីលទាំងនោះទេ។