ប្រធានាធិបតីសហរដ្ឋអាមេរិកលោក Joe Biden កាលពីថ្ងៃចន្ទ (ទី២២ ខែមេសា) បានប្រារព្ធទិវាផែនដី ដោយប្រកាសផ្តល់ជំនួយចំនួន ៧ពាន់លានដុល្លារអាមេរិកដល់គម្រោងថាមពលពន្លឺព្រះអាទិត្យ (ផ្ទាំងសូឡា) សម្រាប់លំនៅឋាន ដែលនឹងផ្តល់ថាមពលដល់គ្រួសារមានចំណូលទាបជិត ១លានគ្រួសារ។
សេចក្តីប្រកាសនេះចាប់ផ្តើមនូវព្រឹត្តិការណ៍រយៈពេល ១សប្តាហ៍ ក្នុងគោលបំណងបង្ហាញកំណត់ត្រានៃរដ្ឋបាលរបស់លោក ស្តីអំពីបម្រែបម្រួលអាកាសធាតុ។
លោក Biden បានប្រាប់ពីការផ្តល់មូលនិធិនេះ អំឡុងពេលធ្វើសុន្ទរកថា នៅឧទ្យាន Prince William Forest Park ក្នុងទីក្រុង Triangle រដ្ឋ Virginia ជាកន្លែងដែលលោកក៏បានប្រកាសផងដែរថា ការដាក់ពាក្យត្រូវបានបើកចំហ ដើម្បីបានចូលរួមជាមួយការិយាល័យអាកាសធាតុ American Climate Corps ដែលជាកម្មវិធីរៀបចំឡើង ដើម្បីឲ្យមនុស្សវ័យក្មេងទទួលបានការងារនៅក្នុងឧស្សាហកម្ម ទាក់ទងនឹងអាកាសធាតុ។
អ្នកបោះឆ្នោតវ័យក្មេងដែលហាក់ដូចជាខ្វល់ខ្វាយកាន់តែខ្លាំងឡើងៗអំពីបម្រែប្រួលអាកាសធាតុ គឺជាសមរភូមិដ៏សំខាន់មួយ សម្រាប់លោក Biden ដែលជាសមាជិករបស់គណបក្សប្រជាធិបតេយ្យ ខណៈដែលលោកត្រៀមខ្លួនប្រឈមជាមួយអតីតប្រធានាធិបតី លោក Donald Trump របស់គណបក្សសាធារណរដ្ឋ នៅក្នុងការបោះឆ្នោតប្រធានាធិបតីថ្ងៃទី៥ ខែវិច្ឆិកា។
ការផ្តល់មូលនិធិលើគម្រោងផ្ទាំងសូឡាចំនួន ៧ពាន់លានដុល្លារអាមេរិក តាមរយៈកម្មវិធីផ្ទាំងសូឡារបស់ទីភ្នាក់ងារការពារបរិស្ថាន សម្រាប់ការប្រកួតប្រជែងផ្តល់ជំនួយ ដើម្បីទាំងអស់គ្នា ត្រូវបានរួមបញ្ចូលនៅក្នុងច្បាប់ដ៏សំខាន់របស់លោក Biden ស្តីពីបម្រែបម្រួលអាកាសធាតុ ដែលជាច្បាប់កាត់បន្ថយអតិផរណា។ ហើយបើយោងតាមសេតវិមាន បានឲ្យដឹងថា កម្មវិធីនេះនឹងបង្កើតការងារបាន ២០០.០០០កន្លែង និងជួយគ្រួសារជាច្រើនសន្សំសំចៃប្រមាណជា ៤០០ដុល្លារ ក្នុងមួយឆ្នាំ។
ដោយកត់សម្គាល់ថា គ្រួសារដែលមានប្រាក់ចំណូលទាប អាចចំណាយរហូតដល់ ៣០ភាគរយលើវិក្កយបត្រថាមពល លោក Biden បាននិយាយថា៖ «ថាមពលពន្លឺព្រះអាទិត្យ ដើម្បីទាំងអស់គ្នា នឹងផ្តល់ឲ្យយើងនូវទីកន្លែងដកដង្ហើមកាន់តែច្រើន និងស្អាតជាងមុន»៕