ការវាយលុករបស់អ៊ីស្រាអែលដែលរំពឹងទុកលើក្រុងរ៉ាហ្វា (Rafah) បានធ្វើឲ្យក្រុមជំនួយស្វះស្វែងរកមធ្យោបាយ ដើម្បីជួយជនស៊ីវិល ១,៥ លាននាក់ដែលកំពុងជ្រកកោន នៅក្នុងទីក្រុងហ្កាហ្សាភាគខាងត្បូង ប៉ុន្តែការកំណត់ពេលវេលាមិនច្បាស់លាស់ បង្កជាសុបិន្តអាក្រក់។
លោក Bushra Khalidi ប្រធានផ្នែកតស៊ូមតិនៅអង្គការ Oxfam បាននិយាយថា៖«យើងតែងតែត្រូវបានរៀបចំជាមួយនឹងផែនការ ដើម្បីបង្កើន ឬបន្ថយ ប៉ុន្តែតាមពិតទៅ យើងមិនដឹងថា ត្រូវរំពឹងអ្វីនោះទេ»។
អង្គការ Oxfam បានចូលរួមជាមួយក្រុមជំនួយចំនួន ១២ផ្សេងទៀត នៅក្នុងការអំពាវនាវរួមគ្នាមួយសម្រាប់បទឈប់បាញ់ នៅថ្ងៃទី៣ ខែមេសា ដោយសង្កត់ធ្ងន់ថា ជនស៊ីវិលជាងមួយលាននាក់រួមទាំងកុមារយ៉ាងហោចណាស់ ៦១០.000 នាក់ «កំពុងស្ថិតក្នុងគោលដៅនៃការវាយប្រហារ» នៅក្នុងទីក្រុងរ៉ាហ្វា។
លោកនាយករដ្ឋមន្ត្រី បេនចាមីន ណេតាន់យ៉ាហ៊ូ ( Benjamin Netanyahu) បាននិយាយម្តងហើយម្តងទៀតថា អ៊ីស្រាអែល នឹងបន្តការវាយលុកដែលត្រូវបានគំរាមកំហែងលើទីក្រុងរ៉ាហ្វា ដែលជាមជ្ឈមណ្ឌលដែលមានប្រជាជនដ៏ច្រើនចុងក្រោយ នៅក្នុងតំបន់ហ្កាហ្សាដែលកងទ័ពជើងគោកអ៊ីស្រាអែល មិនទាន់បានចូល។
នាយករដ្ឋមន្ត្រីដែលចូលចិត្តសង្គ្រាមរូបនេះ បានអះអាងថា ការបំផ្លិចបំផ្លាញកងវរសេនាតូចរបស់ហាម៉ាស ដែលនៅសេសសល់ នៅក្នុងទីក្រុងរ៉ាហ្វា គឺមានសារៈសំខាន់ចំពោះសង្គ្រាមរបស់រដ្ឋាភិបាលលោក ក្នុងគោលបំណងបំផ្លាញក្រុមឥស្លាម នៅតំបន់ហ្កាហ្សា។
ប៉ុន្តែសម្ព័ន្ធមិត្តដ៏រឹងមាំបំផុតរបស់អ៊ីស្រាអែល គឺសហរដ្ឋអាមេរិក បាននិយាយម្តងហើយម្តងទៀតថា ខ្លួនប្រឆាំងនឹងប្រតិបត្តិការណាមួយនៅក្នុងទីក្រុងរ៉ាហ្វា ដោយគ្មានវិធានការគួរឲ្យទុកចិត្ត ដើម្បីការពារជន ស៊ីវិល។