ទីក្រុងប៉េកាំង នៅថ្ងៃអង្គារ (ទី២៣ ខែមេសា) នេះ បាននិយាយថា ការចាប់ខ្លួន និងការចោទប្រកាន់ នៅក្នុងប្រទេសអាល្លឺម៉ង់ និងចក្រភពអង់គ្លេស លើបុគ្គលដែលត្រូវបានចោទប្រកាន់ពីបទធ្វើចារកម្មឲ្យប្រទេសចិន ត្រូវបានរៀបចំឡើង ដើម្បី«លាបពណ៌ និងដាក់គំនាប» លើខ្លួន។

គួរបញ្ជាក់ថា រដ្ឋអាជ្ញាបានឲ្យដឹងនៅក្នុងសេចក្តីថ្លែងការណ៍មួយថា អ្នកស៊ើបអង្កេត នៅអាល្លឺម៉ង់ បានចាប់ខ្លួនជនជាតិអាល្លឺម៉ង់ ៣នាក់ នៅភាគខាងលិចប្រទេស កាលពីថ្ងៃចន្ទ (ទី២២ ខែមេសា) ដោយសង្ស័យថា បានចែករំលែកព័ត៌មានស្តីពីបច្ចេកវិទ្យាដែនសមុទ្រ។ ជនសង្ស័យទាំង ៣នាក់ដែលត្រូវបានកំណត់អត្តសញ្ញាណត្រឹមតែឈ្មោះ Herwig F, Ina F និង Thomas R ត្រូវបានចោទប្រកាន់ថា បានចូលរួមក្នុងគម្រោងប្រមូលព័ត៌មានដែលផ្តល់មូលនិធិដោយទីភ្នាក់ងាររដ្ឋរបស់ចិន ក៏ដូចជាការនាំចេញឡាស៊ែរដោយខុសច្បាប់ទៅកាន់ប្រទេសចិន។

នៅប្រទេសអង់គ្លេសឯណោះវិញ បុរស ២នាក់ត្រូវបានចោទប្រកាន់នៅថ្ងៃតែមួយ ពីបទប្រគល់ «អត្ថបទ ការកត់ត្រា ឯកសារ ឬព័ត៌មាន» ទៅឲ្យប្រទេសចិន ចន្លោះឆ្នាំ២០២១ និងឆ្នាំមុន។ នគរបាលបានកំណត់អត្តសញ្ញាណបុរសនោះថា ឈ្មោះ Christopher Berry អាយុ ៣២ឆ្នាំ និង Christoper Cash អាយុ ២៩ឆ្នាំ ដែលពីមុនធ្វើការជាអ្នកស្រាវជ្រាវ នៅសភារបស់ចក្រភពអង់គ្លេស។

នៅថ្ងៃអង្គារនេះ អ្នកនាំពាក្យក្រសួងការបរទេសចិនលោក Wang Wenbin ត្រូវបានអ្នកសារព័ត៌មានសួរសំណួរជាច្រើនពាក់ព័ន្ធនឹងការចោទប្រកាន់នេះ។ លោក Wang បានឆ្លើយថា៖ «របាយការណ៍ថ្មីៗ អំពីសកម្មភាពចារកម្មរបស់ចិន នៅអឺរ៉ុប ត្រូវបានបង្កើតឡើង ដោយមានគោលបំណងលាបពណ៌ និងដាក់គំនាបមកលើប្រទេសចិន។ មិនត្រឹមតែមានរបាយការណ៍ពីប្រទេសអាល្លឺម៉ង់ប៉ុណ្ណោះទេ ប៉ុន្តែយើងក៏បានកត់សម្គាល់របាយការណ៍ស្រដៀងគ្នានេះពីចក្រភពអង់គ្លេស ក្នុងរយៈពេល ២ថ្ងៃកន្លងមកនេះ»។

លោកបានសង្កត់ធ្ងន់ថា៖ «យើងសូមប្រឆាំងយ៉ាងដាច់អហង្ការ ចំពោះការប្រឌិដ្ឋឡើងបែបនេះ ហើយជំរុញឲ្យភាគីពាក់ព័ន្ធបញ្ឈប់ការផ្សព្វផ្សាយព័ត៌មានមិនពិតអំពីអ្វីដែលហៅថា ការគំរាមកំហែងចារកម្មរបស់ប្រទេសចិន ពោលគឺបញ្ឈប់ការរៀបចំឧបាយកលនយោបាយ និងការបង្ខូចកេរ្តិ៍ឈ្មោះក្នុងន័យព្យាបាទ ប្រឆាំងនឹងប្រទេសចិន»៕