អ៊ីតាលី៖ វិទ្យាស្ថានសុខភាពជាតិ (ISS) បាននិយាយកាលពីថ្ងៃអង្គារ ទី២៧ ខែកក្កដាថា មនុស្សស្ទើរតែ ៩៩% ដែលបានស្លាប់ដោយសារជំងឺ COVID-19 នៅក្នុងប្រទេសអ៊ីតាលី ចាប់តាំងពីខែកុម្ភៈឆ្នាំនេះមិនបានចាក់វ៉ាក់សាំងពេញលេញ ឬគ្រប់ដូសទេ។
ការសិក្សាដែលបានកត់ត្រានៅក្នុងរបាយការណ៍ទៀងទាត់ ស្តីពីការស្លាប់ដោយសារជំងឺ COVID-19 ដែលចេញផ្សាយដោយស្ថាប័នសុខភាពសាធារណៈបានបន្ថែមថា មនុស្សមួយចំនួនតូចដែលបានទទួលវ៉ាក់សាំងពេញលេញ ដែលបានស្លាប់ដោយសារជំងឺនេះក៏មានអាយុច្រើនជាងអ្នកដែលបានស្លាប់ ដោយមិនបានចាក់វ៉ាក់សាំងពេញលេញផងដែរគឺមានអាយុ ៨៨ឆ្នាំ ៦ខែ ទល់នឹង ៨០ឆ្នាំ។ ពួកគេក៏មានបញ្ហាសុខភាពជាច្រើនទៀតផងដែរ មុនពេលឆ្លងវីរុសនេះ។
កាលពីសប្តាហ៍មុន ប្រទេសអ៊ីតាលីបានអនុវត្តតាមប្រទេសបារាំងក្នុងការប្រកាសថា ភស្តុតាងនៃការបញ្ជាក់ពីការចាក់វ៉ាក់សាំងរួច ឬភាពស៊ាំនឹងវីរុស COVID-19 នឹងចាំបាច់សម្រាប់សកម្មភាពជាច្រើន រួមមានការបរិភោគអាហារក្នុងតំបន់ និងការចូលទៅកន្លែងនានាដូចជាកន្លែងហាត់ប្រាណ អាងហែលទឹក សារមន្ទីរ និងរោងភាពយន្តជាដើម។ ក្រសួងសុខាភិបាលបាននិយាយថា ប្រទេសអ៊ីតាលីបានរាយការណ៍ពីការស្លាប់ ទាក់ទងនឹងវីរុសកូរ៉ូណាចំនួន ២៤នាក់កាលពីថ្ងៃអង្គារ បើធៀបទៅនឹងមួយថ្ងៃមុនមានត្រឹម ២២នាក់ ខណៈដែលចំនួនសរុបនៃការឆ្លងថ្មីកើនឡើងដល់ ៤.៥២២នាក់ពីចំនួន ៣.១១៧នាក់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
