ព្រឹទ្ធសភាអាមេរិក កាលពីថ្ងៃអង្គារ (ទី២៣ ខែមេសា) បានអនុម័តច្បាប់ដែលផ្តល់នូវរយៈពេលប្រហែល ៩ខែដល់ម្ចាស់ជនជាតិចិនរបស់បណ្ដាញសង្គម TikTok គឺក្រុមហ៊ុន ByteDance ឲ្យលក់ទ្រព្យសម្បត្តិនៃកម្មវិធីវីដេអូខ្លី នៅសហរដ្ឋអាមេរិក ឬបើមិនដូច្នោះទេត្រូវប្រឈមនឹងការហាមឃាត់ទូទាំងប្រទេស។ ប្រធានាធិបតីលោក Joe Biden បាននិយាយថា លោកនឹងចុះហត្ថលេខាលើច្បាប់នេះ នៅថ្ងៃពុធ (ទី២៤ ខែមេសា) នេះ។ ហើយនេះជាអ្វីដែលទំនងជានឹងកើតឡើងនាពេលបន្ទាប់ សម្រាប់បណ្ដាញសង្គម TikTok មួយនេះ។
នៅពេលដែលលោក Biden ចុះហត្ថលេខាលើសំណើច្បាប់នេះ នាឡិការយៈពេល ២៧០ថ្ងៃចាប់ផ្តើមដើរ ពោលគឺជាពេលវេលាដែលក្រុមហ៊ុន ByteDance ត្រូវតែលក់ TikTok។ នៅជិតបញ្ចប់រយៈពេល ៩ខែនោះ ប្រសិនបើមើលទៅ ByteDance ជិតបញ្ចប់ដំណើរការលក់ដូរនោះ ប្រធានអាចអនុញ្ញាតបន្ថែមពេល ៩០ថ្ងៃទៀត ដើម្បីឲ្យកិច្ចព្រមព្រៀងណាមួយត្រូវបានបញ្ចប់សព្វគ្រប់។ ប្រសិនបើសំណើច្បាប់នេះត្រូវបានចុះហត្ថលេខាឲ្យចូលជាច្បាប់ជាធរមានក្នុងសប្តាហ៍នេះ ដូចដែលបានរំពឹងទុក រយៈពេល ២៧០ថ្ងៃ នឹងបញ្ចប់ក្នុងរង្វង់ការចូលកាន់តំណែងរបស់ប្រធានាធិបតីបន្ទាប់របស់សហរដ្ឋអាមេរិក នៅថ្ងៃទី២០ ខែមករា ឆ្នាំ២០២៥ ដែលនឹងធ្វើឲ្យមានការសម្រេចលើការបន្ថែមរយៈពេល ៣ខែទៀត ទាំងសម្រាប់លោក Biden របស់គណបក្សប្រជាធិបតេយ្យដែលកំពុងស្វែងរកការជាប់ឆ្នោតឡើងវិញ ឬបេក្ខជនឈានមុខគេខាងគណបក្សសាធារណរដ្ឋ គឺលោក Donald Trump។
នៅពេលដែលសេចក្ដីស្នើច្បាប់នេះ ត្រូវបានចុះហត្ថលេខាឲ្យក្លាយជាច្បាប់ធរមាន គេរំពឹងថា បណ្ដាញសង្គម TikTok នឹងប្តឹងដើម្បីបញ្ឈប់ច្បាប់នេះ។ មេធាវីរបស់ TikTok ក៏ត្រូវបានគេរំពឹងថា នឹងស្នើសុំតុលាការឲ្យមានដីកាបឋម។ TikTok ចង់បានដីការារាំងការអនុវត្តច្បាប់ដើម្បីអនុញ្ញាតឲ្យការតវ៉ាពេញលេញរបស់ខ្លួន ប្រឆាំងនឹងធម្មនុញ្ញភាពនៃច្បាប់នេះដំណោះការទៅមុខបាន។ អ្វីដែលសំខាន់ថា តើទាំងអស់នេះនឹងចំណាយពេលយូរប៉ុនណា? ប្រសិនបើ TikTok ទទួលបានដីកាសម្រេចបឋមពីតុលាការដោយជោគជ័យ ដំណើរការលក់ដោយបង្ខំត្រូវបានបញ្ឈប់ ដែលអាចផ្តល់ឲ្យ TikTok នូវពេលវេលាបន្ថែមទៀតដើម្បីធ្វើប្រតិបត្តិការដោយសេរីនៅសហរដ្ឋអាមេរិក។
លើសពីនេះទៀត អំឡុងពេលនេះ តើកម្មវិធីរបស់ TikTok នឹងផ្លាស់ប្តូរទាំងស្រុងទេ? កម្មវិធី TikTok មិនគួរផ្លាស់ប្តូរសម្រាប់អ្នកប្រើប្រាស់ចំនួន ១៧០លាននាក់ នៅសហរដ្ឋអាមេរិកនោះទេ ចន្លោះពេលនេះ និងចុងបញ្ចប់នៃរយៈពេលនៃការលក់ដូរនេះ ក្នុងរយៈពេល ៤ខែដំបូងនៃឆ្នាំ២០២៥។ ហើយពាក់ព័ន្ធនឹងករណីរបស់ TikTok នៅសហរដ្ឋអាមេរិកនេះ តើរដ្ឋាភិបាលចិននិយាយអ្វីខ្លះ? ប្រទេសចិនមានបញ្ជីបច្ចេកវិទ្យាដែលត្រូវការការយល់ព្រមពីរដ្ឋាភិបាលចិន មុននឹងនាំចេញទៅក្រៅប្រទេស។ អ្នកជំនាញបាននិយាយថា នីតិវិធីដោះស្រាយការណែនាំរបស់ TikTok នឹងស្ថិតនៅក្រោមបញ្ជីនេះ៕