យោងតាមប្រភពជាច្រើន កាលពីថ្ងៃអង្គារ (ទី២៣ ខែមេសា) បានឲ្យដឹងថា យោធារបស់ប្រទេសកូរ៉េខាងត្បូង កំពុងពិចារណាហាមឃាត់យ៉ាងទូលំទូលាយលើការប្រើប្រាស់ទូរសព្ទ iPhone នៅក្នុងអគារយោធា ដោយសារតែមានការព្រួយបារម្ភកាន់តែខ្លាំងឡើងអំពីការលេចធ្លាយព័ត៌មានរសើប តាមរយៈការថតសំឡេង។

ប្រភពពីមន្ត្រីមួយក្រុមដែលសុំនិយាយក្នុងលក្ខខណ្ឌមិនបញ្ចេញឈ្មោះ បានប្រាប់ថា ទីបញ្ជាការកងទ័ពអាកាស បានចេញសេចក្តីប្រកាសផ្ទៃក្នុងមួយនៅលើម៉ាស៊ីនមេអ៊ីនត្រាណែតរបស់យោធា កាលពីថ្ងៃទី១១ ខែមេសា ដោយដាក់ចេញនូវការហាមឃាត់ទាំងស្រុងលើឧបករណ៍ណាមួយដែលមានសមត្ថភាពថតសំឡេង និងមិនអនុញ្ញាតឲ្យកម្មវិធីភាគីទី៣ គ្រប់គ្រងមុខងារដែលមានស្រាប់ ចាប់ផ្តើមពីថ្ងៃទី១ ខែមិថុនា ដោយទូរសព្ទ iPhone ត្រូវបានចាត់ទុកថា ជាឧបករណ៍ដែលត្រូវហាមឃាត់។

យោងតាមឯកសារនោះ បានឲ្យដឹងថា ការសម្រេចហាមឃាត់ទូរសព្ទ iPhone ក្នុងវិស័យយោធា បានកើតមានពីកិច្ចប្រជុំរួមគ្នាដែលធ្វើឡើងដោយទីស្នាក់ការកណ្តាលនៃកងទ័ពជើងទឹក និងកងទ័ពអាកាស ដែលមានទីតាំងនៅទីក្រុង Gyeryongdae ក្នុងខេត្ត South Chungcheong។

លើសពីនេះទៀត ប្រសិនបើការហាមឃាត់ត្រូវបានពង្រីក វាទំនងជាហួសពីតំបន់ Gyeryongdae ដើម្បីរួមបញ្ចូលអង្គភាពផ្សេងទៀតទាំងអស់ទូទាំងប្រទេស។ ឧបករណ៍ដែលកំណត់ត្រូវហាមឃាត់ រួមមាននាឡិកាឆ្លាតវៃគ្រប់ប្រភេទ និងឧបករណ៍អាចពាក់បានផងដែរ។

ប្រសិនបើការហាមឃាត់ត្រូវបានពង្រីកដល់គ្រប់អង្គភាពក្រោមបង្គាប់ វានឹងប៉ះពាល់ដល់បុគ្គលិកយោធាជិត ៥០០.០០០នាក់។ យោងតាមវិទ្យាស្ថាន Korea Institute for Defense Analyses (វិទ្យាស្ថានកូរ៉េសម្រាប់ការវិភាគការពារជាតិ) ដែលជាវិទ្យាស្ថានស្រាវជា្រវស្ថិតក្រោមការគ្រប់គ្រងក្រសួងការពារជាតិ បានឲ្យដឹងថា ចំនួនបុគ្គលិកយោធាសរុប គឺ ៤.៩៩៨.០០០នាក់ គិតត្រឹមឆ្នាំ២០២២ ដែលក្នុងនោះមានកងទ័ពចំនួន ៣៦៥.០០០នាក់ កងទ័ពជើងទឹក ៦៩.០០០នាក់ និងកងទ័ពអាកាស ៦៥.០០០នាក់៕