វិហារសាសនាគ្រិស្តនិកាយអូស្សូដក់ នៅទីក្រុងមូស្គូរបស់រុស្ស៊ី បាននិយាយថា បព្វជិតជនជាតិរុស្សី ១អង្គ ដែលបានធ្វើជាអធិបតីក្នុងពិធីរំលឹកវិញ្ញាណក្ខន្ធដល់អតីតមេដឹកនាំប្រឆាំងរុស្ស៊ី លោក Alexei Navalny ក្នុងខែមីនា ត្រូវបានព្យួរពីតួនាទីនៅព្រះវិហាររយៈពេល ៣ឆ្នាំ។

នៅក្នុងសេចក្តីថ្លែងការណ៍ដែលបានចេញផ្សាយនៅលើគេហទំព័ររបស់ខ្លួន កាលពីថ្ងៃអង្គារ (ទី២៣ ខែមេសា) ព្រះវិហារនេះមិនបាននិយាយពីអ្វីដែលជាហេតុផលនាំឲ្យមានការដាក់ទណ្ឌកម្មនេះដែលហាមឃាត់បព្វជិត Dmitry Safronov មិនឲ្យបំពេញតួនាទីឲ្យពរ ពាក់សម្លៀកបំពាក់ និងកាន់ឈើឆ្កាងពិសិដ្ឋរបស់ព្រះវិហារ រហូតដល់ឆ្នាំ២០២៧។ បព្វជិត Safronov ក៏ត្រូវផ្លាស់ទៅព្រះវិហារមួយផ្សេងទៀត នៅទីក្រុងមូស្គូ ដើម្បីបំពេញភារកិច្ចជាអ្នកសូត្រចម្រៀងពិសិដ្ឋសរសើរព្រះ។

គួរបញ្ជាក់ថា កាលពីថ្ងៃទី២៦ ខែមីនា បព្វជិត Safronov បានប្រារព្ធពិធីរំលឹកវិញ្ញាណក្ខន្ធដែលមានការចូលរួមដោយមនុស្សរាប់ពាន់នាក់ សម្រាប់សពលោក Navalny ដែលជាអ្នករិះគន់ដ៏ខ្លាំងក្លាបំផុត ចំពោះប្រធានាធិបតី វ្ល៉ាឌីមៀរ ពូទីន នៅប្រទេសរុស្ស៊ី និងដែលបានទទួលមរណភាពក្នុងវ័យ ៤៧ឆ្នាំនៅក្នុងពន្ធនាគារអាកទិក ក្នុងខែកុម្ភៈ៕