រដ្ឋបាលចំណីអាហារ និងឱសថអាមេរិក (FDA) កាលពីថ្ងៃអង្គារ (ទី២៣ ខែមេសា) បានឲ្យដឹងថា ខ្លួនបានរកឃើញភាគល្អិតនៃមេរោគផ្តាសាយបក្សីនៅក្នុងសំណាកមួយចំនួនរបស់ទឹកដោះគោ ដែលត្រូវបានសម្លាប់មេរោគ ប៉ុន្តែបាននិយាយថា ការផ្គត់ផ្គង់ទឹកដោះគោពាណិជ្ជកម្ម នៅតែមានសុវត្ថិភាពដដែល។

FDA បានប្រាប់ថា ដោយសារតែទឹកដោះគោត្រូវបានសម្លាប់មេរោគរួចហើយ វានៅតែមានសុវត្ថិភាពសម្រាប់ឲ្យមនុស្សប្រើប្រាស់ ខណៈដំណើរការនេះ សម្លាប់បាក់តេរី និងមេរោគដែលបង្កគ្រោះថ្នាក់ ដោយប្រើការកម្ដៅទឹកដោះគោនៅសីតុណ្ហភាពជាក់លាក់មួយ។

FDA បានបន្ថែមថា៖ «ដោយផ្អែកលើព័ត៌មានដែលមាន ដំណើរការកម្ដៅសម្លាប់មេរោគនេះទំនងជាធ្វើឱ្យមេរោគមិនមានសកម្មភាព ប៉ុន្តែដំណើរការនេះមិនត្រូវបានរំពឹងថា នឹងធ្វើឲ្យលែងមានភាគល្អិតនៃមេរោគនេះនោះឡើយ»។

ទីភ្នាក់ងារនេះបាននិយាយថា ខ្លួនកំពុងវាយតម្លៃទឹកដោះគោពីសត្វដែលរងផលប៉ះពាល់ ដែលស្ថិតនៅក្នុងប្រព័ន្ធកែច្នៃ និងមិនដាក់លក់។ ជាមួយគ្នានេះ ទីភា្នក់ងារបានបញ្ជាក់ថា ខ្លួនកំពុងបញ្ចប់ទាំងស្រុងនូវសំណាកតំណាងដ៏ធំទូទាំងប្រទេស ដើម្បីស្វែងយល់ពីកម្រិតនៃការរកឃើញនេះ។

FDA បានប្រាប់បន្ថែមថា ខ្លួនកំពុងវាយតម្លៃបន្ថែមលើការរកឃើញវិជ្ជមានណាមួយ តាមរយៈការធ្វើតេស្តចាក់មេរោគខ្សោយចូលស៊ុត ដែលស្ថាប័នបានពិពណ៌នាថា ជាស្តង់ដារដ៏ល្អបំផុត ដើម្បីកំណត់មេរោគដែលអាចនៅរស់បាន៕